Улсын бүртгэлийн байгууллага үүсэж хөгжсөний 85 жилийн ойг тохиолдуулан Дорноговь аймгийн улсын бүртгэлийн хэлтсийг онцолж байна.
Дорноговь аймгийн Улсын бүртгэлийн хэлтэс хэдэн онд байгуулагдсан түүхтэй вэ?
Монгол Улсын Засгийн газрын 2008 оны 64 дүгээр тогтоолоор Иргэний бүртгэл мэдээллийн алба, Эд хөрөнгийн эрхийн улсын бүртгэлийн алба, Татварын хэлтсийн Хуулийн этгээдийн бүртгэлийн нэгжийг нэгтгэж Дорноговь аймгийн Улсын бүртгэлийн хэлтэс шинээр байгуулагдсан. УБЕГ-ын даргын 2009 оны 08 дугаар сарын 31-ний өдрийн 231 дүгээр тушаалаар орон тоо батлагдаж, анх 16 орон тоотойгоор үйл ажиллагаагаа эхлүүлсэн.
2012 оноос сумдын улсын бүртгэгч нарыг томилсноор бүх сумдад улсын бүртгэлийн үйлчилгээ хүрдэг болсон.
Танай хэлтсийн удирдлагын залгамж халаа хэрхэн өрнөж ирсэн бэ?
Иргэний бүртгэл мэдээллийн алба байх үе буюу 2001-2008 онд Лутаагийн Нэргүй даргаар ажиллаж байсан. 2009-2016 онд Чүлтэмдоржийн Цогзолмаа, 2016-2025 оны 3 дугаар сар хүртэл Цабширын Тэгшжаргал даргаар ажилласан. 2025 оны 3 дугаар сараас миний бие Сумъяагийн Энх-Эрдэнэ хэлтсийн даргын албан үүргийг гүйцэтгэн ажиллаж байна.
Анхны үеийн үйл ажиллагааны онцлог юу байв?
Манай хэлтэс улсын хэмжээнд иргэний шинэчилсэн бүртгэл, архивын цахимжилт, иргэний үнэмлэх олголт зэрэг олон ажлыг түрүүлж хэрэгжүүлсэнээрээ онцлог. Тухайлбал:
- 2010 онд “Иргэний шинэчилсэн бүртгэл”-ийн ажлыг амжилттай зохион байгуулж улсын хэмжээнд нэгдүгээр байр эзэлсэн.
- 2012 онд БНСУ-ын “KOICA” төслөөр иргэний баримтыг цахимжуулах ажлыг эхлүүлсэн.
- 2014 онд 1951-1988 оны архивын баримтыг бүрэн цахимжуулж хэрэглээнд нэвтрүүлсэн.
- 2012 онд бүх сумдад биеийн давхцахгүй өгөгдлийн бүртгэл хийж цахим үнэмлэх олголтыг эхлүүлсэн.
- 2018 оноос Иргэний улсын бүртгэлийн онлайн программд шилжин ажиллаж эхэлсэн.
Та бүртгэлийн байгууллагад ажиллаж байх хугацаандаа хамгийн тод харагдсан өөрчлөлт юу байв?
Сүүлийн жилүүдэд Улсын бүртгэлийн байгууллагын бүх шатанд хийгдсэн цахим шинэчлэл хамгийн том ахиц дэвшил болсон. Иргэдийн үйлчилгээг авах хугацаа багасч, биеэр ирэх шаардлагагүй олон төрлийн үйлчилгээг цахимаар авах боломж бүрдсэн нь ажлын үр ашгийг бодитоор нэмэгдүүлсэн.
Цахим шилжилт иргэд, албан хаагчдад хэрхэн нөлөөлсөн гэж та үзэж байна вэ?
Нэгдүгээрт, албан хаагчдын ачаалал эрс буурсан.
Хоёрдугаарт, иргэд дараалалд цаг алдах биш, гар утас, компьютерээсээ хүссэн үедээ төрийн мэдээлэл, лавлагааг авдаг болсон.
Засгийн газраас хэрэгжүүлж буй e-Mongolia платформ бүртгэлийн үйлчилгээг илүү хүртээмжтэй болгож, төр ба иргэн хоорондын харилцааг илүү ойлгомжтой, шуурхай болгосон гэж үздэг.
Танай байгууллага сүүлийн үед ямар шинэ, онцлох ажлуудыг хийж хэрэгжүүлсэн бэ?
Бид иргэдэд илүү шуурхай үйлчлэх зорилгоор 7706-0101 дугаартай “One Call” тогтолцоог нэвтрүүлсэн. Ингэснээр иргэд нэг дуудлагаар:
- Паспорт, иргэний үнэмлэх,
- Эд хөрөнгө, хуулийн этгээд,
- Зөрчил, торгууль,
- Өргөдөл гомдлын мэдээллийг шууд авч чаддаг болсон.
Бас нэгэн томоохон шинэчлэл бол сумдад гадаад паспортын захиалга авах эрх нээсэн байдаг. Энэ талаар тодруулбал?
Тийм. Манай аймаг бусад аймгуудаасаа түрүүлж бүх сумандаа үндэсний энгийн гадаад паспортын захиалга авах боломжийг бүрдүүлсэн. Үүний үр дүнд иргэд аймгийн төв хүртэл зорчиж гарах зардал, цаг хугацаагаа хэмнэдэг болсон.
“Монгол шуудан”-тай хамтран 4650 төгрөгийн хамгийн бага тарифаар гадаад паспортыг сумдад эрсдэлгүй хүргэх нөхцөлийг бүрдүүлсэн. Гэрэгэ посс машинаар дамжуулан улсын бүртгэлийн 8 төрлийн хураамжийг шууд төлөх боломжийг нээсэн. Энэ үйлчилгээг эхний ээлжинд хамгийн өндөр ачаалалтай Замын-Үүд суманд нэвтрүүлж, цаашид бусад сумдад үе шаттайгаар нэвтрүүлж байна.
Цаашид цахим үйлчилгээ ямар чиглэлд хөгжүүлэх шаардлагатай гэж үзэж байна вэ?
Одоо байгаа систем сайжирсан ч цаашид бүртгэлийн бүх баримт бичгийг бүрэн цахим хэлбэрт шилжүүлэх, давхардсан мэдээллийг багасгах, нэг дороос олон үйлчилгээ авах боломжийг бий болгох шаардлага бий. Ингэснээр төрийн үйлчилгээ жинхэнэ утгаараа “иргэн төвтэй” болно.
Танай орон нутгийн бүртгэлийн байгууллагын ажилд онцлог нөхцөл, тулгардаг сорилтууд юу байдаг вэ?
Дорноговь аймгийн хувьд улсын бусад аймгаас ялгарах онцлог нөхцөл юу байдаг вэ?
Манай аймаг дамжин өнгөрөх олон улсын автозам, төмөр замын гол зангилаа төдийгүй гадаадтай хиллэдэг Замын-Үүд, Ханги-Мандал гэсэн хоёр боомттой. Энэ нь хүн амын шилжилт хөдөлгөөн, бүртгэлийн ачаалал их байхад нөлөөлдөг.
Хил орчмын сумдын иргэдэд үзүүлдэг тусгай үйлчилгээ гэж бий юу?
Байдаг. Монгол–Хятадын Засгийн газар хоорондын хэлэлцээрийн дагуу хил орчмын зургаан сумын иргэдэд хил дамнан зорчих нэг удаагийн болон олон удаагийн үнэмлэх олгодог нь манай аймгийн үйл ажиллагааны өвөрмөц онцлог юм.
