Улсын бүртгэлийн байгууллагын албан хаагчдын мэдлэг, ур чадварыг дээшлүүлэх, компанийн засаглалын талаарх суурь ойлголтыг нэмэгдүүлэх зорилгоор “Компанийн засаглалын анхан шатны ойлголт” сэдэвт сургалтыг Хууль зүйн үндэсний хүрээлэнтэй хамтран 2025 оны 05 дугаар сарын 25-ны өдөр зохион байгууллаа.
Тус сургалтад Улсын бүртгэлийн ерөнхий газар болон нийслэлийн есөн дүүргийн улсын бүртгэлийн хэлтсийн нийт 35 улсын бүртгэгч, хяналтын улсын байцаагч хамрагдсан бөгөөд компанийн засаглалын үндсэн ойлголт, олон улсын чиг хандлага, дэлхийн улс орнуудын туршлага, холбогдох баримт бичиг, Монгол Улс дахь компанийн засаглалын өнөөгийн нөхцөл байдал, төрийн өмчит компанийн засаглал болон төрийн өмчийн удирдлагын эрх зүйн зохицуулалтын талаар өргөн хүрээний мэдлэг, мэдээлэл олгосон ач холбогдолтой сургалт боллоо.
Сургалтын үеэр байгууллагын үйл ажиллагаанд компанийн засаглалын зарчмыг зөв ойлгон хэрэгжүүлэхийн ач холбогдол, ил тод байдал, хариуцлагатай удирдлага, хяналтын тогтолцоог боловсронгуй болгох асуудлаар оролцогчид санал солилцож, практик жишээнд тулгуурласан хэлэлцүүлэг өрнүүлэв.
Сургалтыг Санхүү, эдийн засгийн их сургууль болон Хууль зүйн сургуулийн багш, доктор (Ph.D) М.Түвшинжаргал удирдан явуулж, оролцогчдын сонирхсон асуултад зөвлөгөө, мэдээлэл өглөө.
