Монгол Улсын Ерөнхийлөгчийн санаачлан хэрэгжүүлж буй уур амьсгалын өөрчлөлтийн сөрөг нөлөөллийг бууруулах, ой, усны нөөцийг хамгаалан нэмэгдүүлэх, экологийн тэнцвэрт байдлыг хадгалах, иргэдийн байгаль орчны боловсрол, оролцоог нэмэгдүүлэх зорилготой “Тэрбум мод” үндэсний хөдөлгөөний хүрээнд жил бүрийн 5 болон 9 дүгээр сарын Бямба, Ням гарагуудыг “Тэрбум мод тарих үндэсний өдөр” болгон зарласан билээ.
Энэхүү ажлын хүрээнд Улсын бүртгэлийн байгууллага 2026 оны 05 дугаар сарын 16-ны өдөр “Мод тарих үндэсний өдөр” арга хэмжээг зохион байгуулж, Хан-Уул дүүргийн 14 дүгээр хороо, Түргэний голын цэцэрлэгт хүрээлэнд хоёр төрлийн, нийт 150 ширхэг мод тарьж суулгалаа.
Байгаль орчноо хамгаалах, ногоон байгууламжийг нэмэгдүүлэх, байгууллагын нийгмийн хариуцлагыг хэрэгжүүлэх зорилготой тус арга хэмжээнд Улсын бүртгэлийн ерөнхий газрын удирдах албан тушаалтнууд болон албан хаагчид идэвхтэй оролцож, нийт 130 ширхэг бургас, 20 ширхэг монос модыг тус тус тарьсан юм.
Цаашид Улсын бүртгэлийн байгууллага нь байгаль орчныг хамгаалах, мод тарьж ургуулах, ногоон хөгжилд чиглэсэн үйл ажиллагааг тогтмол зохион байгуулж, байгальд ээлтэй жишиг байгууллага болохоор зорьж байна.
Ташрамд дурдахад, “Тэрбум мод” үндэсний хөдөлгөөний зорилго нь Монгол Улсын цөлжилт, газрын доройтлыг бууруулах, ногоон байгууламжийн хэмжээг нэмэгдүүлэх, иргэн, аж ахуйн нэгж, байгууллагын байгаль орчны өмнө хүлээх хариуцлага, оролцоог идэвхжүүлэхэд чиглэж байна. Мөн мод тарих, арчлан ургуулах үйл ажиллагааг тогтмолжуулснаар эрүүл, аюулгүй орчинд амьдрах нөхцөлийг бүрдүүлэх, тогтвортой хөгжлийн зорилтуудыг хэрэгжүүлэхэд бодит хувь нэмэр оруулах ач холбогдолтой юм.
