Улсын бүртгэлийн ерөнхий газрын дарга Д.Дэлгэрсайхан өнөөдөр /2020.08.26/ Бүгд Найрамдах Солонгос Улсын Олон улсын хамтын ажиллагааны байгууллага буюу КОЙКА-гийн Монгол Улс дахь суурин төлөөлөгчийн газрын орлогч дарга хатагтай Ким Сү Янъ-ийг хүлээн авч уулзлаа.
Уулзалтын эхэнд УБЕГ-ын дарга Д.Дэлгэрсайхан тус газар 2011 онд БНСУ-ын КОЙКА-тай хамтын ажиллагаагаа эхлүүлж, “Улсын бүртгэл, мэдээллийн нэгдсэн системийг сайжруулах Цахим архивын төсөл”-ийг амжилттай хэрэгжүүлсэн болохыг дурдлаа. Тэрбээр, энэхүү хамтын ажиллагааны үргэлжлэл болох Бүгд Найрамдах Солонгос Улсын Олон улсын хамтын ажиллагааны байгууллагаас Монгол Улсад буцалтгүй тусламжийн хөрөнгөөр санхүүжих төслүүдээс хамгийн том нь “Улсын бүртгэлийн байгууллагын дэд бүтцийг хөгжүүлэх замаар иргэдэд төрийн үйлчилгээг цахим хэлбэрээр хүргэх төсөл” юм гээд “Нэг иргэн - нэг бүртгэл” үндэсний хөтөлбөрийг дэмжин төрийн үйлчилгээг жигд, тэгш хүргэх нөхцлийг бүрдүүлэхэд уг төсөл чухал ач холбогдолтой болохыг онцолж байв.
Хатагтай Ким Сү Янъ Улсын бүртгэлийн ерөнхий газрын даргыг цаг зав гарган хүлээн авсанд талархал илэрхийлээд тус газрын даргаар томилогдсонд баяр хүргэхийн сацуу өмнө нь УБЕГ-ын дэд даргаар ажиллаж байсан тул төслийн явц болон үйл ажиллагааг сайн мэдэж байгаад баяртай буйгаа илэрхийлэв. Тэрбээр, БНСУ-ын КОЙКА-гийн буцалтгүй тусламжийн хөрөнгөөр санхүүжүүлж хэрэгжүүлэхээр болсон төслийн талаарх цаг үеийн мэдээллийг танилцуулж, “КОВИД-19" цар тахлын улмаас үүссэн нөхцөл байдлаас улбаалж төлөвлөгөөт ажил тодорхой хугацаагаар хойшилсон болохыг дуулгав.
Уулзалтаар талууд төсөлтэй холбогдуулан цаашдын хамтын ажиллагааны талаар санал солилцож, хэвийн үйл ажиллагааг үргэлжлүүлэхийн тулд нягт холбоотой ажиллахаар тохиролцлоо.
УБЕГ-ын Хамтын ажиллагаа, сургалтын хэлтэс
