Хүүхдийн төлөө “За бол заавал хийе” аяны хүрээнд Налайх дүүргийн Улсын бүртгэлийн хэлтсээс албан хаагчдынхаа хүүхдүүдэд зориулан “Цахим донтолт” сэдэвт сургалтыг зохион байгууллаа.
Сургалтыг Налайх дүүргийн Хүүхэд, гэр бүлийн хөгжил, хамгааллын хэлтсийн мэргэжилтэн Э.Нандинцэцэг чиглүүлж, нийт 15 хүүхэд хамрагдав.
Сургалтын үеэр хүүхдүүдэд цахим орчин, интернэт болон цахим тоглоомын зохистой хэрэглээ, хэт их хэрэглээнээс үүдэн хүүхдийн эрүүл мэнд, сэтгэл зүй, зан төлөв, сурлагад үзүүлэх сөрөг нөлөөллийн талаар мэдээлэл өгч, цахим донтолтын шинж тэмдэг, түүнээс урьдчилан сэргийлэх арга замуудыг танилцууллаа.
Мөн дэлгэцийн хэрэглээгээ зөв зохицуулах, цахим орчинд өнгөрүүлэх цагаа хязгаарлах, чөлөөт цагаа үр бүтээлтэй өнгөрүүлэх, гэр бүл, найз нөхөдтэйгөө бодит харилцаа, идэвхтэй хөдөлгөөн, спортоор хичээллэхийн ач холбогдлын талаар зөвлөгөө, мэдээлэл өгч, хүүхдүүдийн оролцоог хангасан байдлаар сургалтыг зохион байгуулсан юм.
Хүүхдийг цахим орчны болзошгүй эрсдэлээс хамгаалах, цахим хэрэглээний зөв дадал хэвшүүлэхэд гэр бүл, эцэг эх, асран хамгаалагчдын оролцоо чухал. Иймд тус хэлтсээс хүүхдүүдэд цахим хэрэглээний талаар зөв ойлголт, мэдлэг олгох, эрүүл аюулгүй орчинд өсөж хөгжихөд нь дэмжлэг үзүүлэх зорилгоор энэхүү сургалтыг зохион байгууллаа.
