Улсын бүртгэлийн ерөнхий газрын дарга Б.Баасандорж өнөөдөр /2019.08.13/ Бүгд Найрамдах Солонгос Улсын Олон улсын хамтын ажиллагааны байгууллага буюу КОЙКА-гийн Монгол Улс дахь суурин төлөөлөгчийн газрын Төсөл, хамтын ажиллагаа хариуцсан орлогч дарга хатагтай Ким Сү Янгь-ийг хүлээн авч уулзлаа.

Уулзалтын эхэнд УБЕГ-ын дарга Б.Баасандорж тус газар 2011 оноос БНСУ-ын КОЙКА-тай хамтын ажиллагаатай ирсэн болохыг дурдаж, Монгол Улсын хэмжээнд буюу 21 аймгийн 330 сум, нийслэлийн 9 дүүргийн 152 хороонд “Улсын бүртгэлийн байгууллагын дэд бүтцийг хөгжүүлэх замаар иргэдэд төрийн үйлчилгээг цахим хэлбэрээр хүргэх төсөл” ирэх 2020 оноос БНСУ-ын КОЙКА-гийн буцалтгүй тусламжийн хөрөнгөөр санхүүжүүлж хэрэгжүүлэхээр болсонд талархал илэрхийлэв. Тэрбээр, төрийн үйлчилгээг иргэдэд шуурхай хүргэх хүрээнд Улсын бүртгэлийн ерөнхий газар 2018 оноос Азийн хөгжлийн банктай хамтран төсөл хэрэгжүүлж эхэлснээр Монгол Улсын бүх аймаг, сум, нийслэлийн дүүрэг, хороог сүлжээнд холбохоор ажиллаж буй талаар танилцуулав. Харин БНСУ-ын КОЙКА-тай хамтран хэрэгжүүлэх төслийн хүрээнд улсын бүртгэлийн байгууллагын аймаг, нийслэлийн бүх нэгжийг орчин үеийн техник, тоног төхөөрөмжөөр хангаж ажиллахаар зорьж байна гэв.

            Хатагтай Ким Сү Янгь УБЕГ-ын даргыг цаг зав гарган хүлээн авсанд талархал илэрхийлээд 2020 оноос БНСУ-ын КОЙКА-гийн буцалтгүй тусламжийн хөрөнгөөр санхүүжүүлж хэрэгжүүлэхээр болсон төслийн талаарх товч танилцуулгыг хийж, ирэх 10 дугаар сарын эхээр уг төслийн судалгааны баг ирж ажиллах болсныг дуулгалаа. Түүнчлэн, төсөлтэй холбогдуулан хоёр байгууллагын цаашдын хамтын ажиллагааны талаар санал солилцож, төслийн гол зорилго бол Монгол Улсын төрийн үйлчилгээг иргэнд нь хүргэхэд оршиж буйг онцолж байв.

            УБЕГ-ын дарга Б.Баасандорж энэхүү төсөл амжилттай хэрэгжснээр иргэдэд чиглэсэн төсөл болохыг тодотгож, иргэд илүү үр шим хүртэх учраас уг төсөлд ихээхэн ач холбогдол өгч байна гэлээ.

            Уулзалтад КОЙКА-гийн төслийн менежер Б.Энхсаруул, УБЕГ-ын Мэдээллийн технологийн газрын дарга Д.Ган-Эрдэнэ, Мэдээллийн сүлжээ, техник ашиглалтын хэлтсийн ахлах мэргэжилтэн Б.Чойжилсүрэн нар оролцлоо.

Улсын бүртгэлийн ерөнхий газар