Архив, албан хэрэг хөтлөлтийн үйл ажиллагааг боловсронгуй болгох, баримт бичиг боловсруулах, бүрдүүлэх, баталгаажуулах үйл ажиллагаанд нэгдсэн стандарт, арга зүй нэвтрүүлэх зорилгоор шинэчлэн батлагдсан MNS 5140:2026 цуврал стандартын агуулга, хэрэгжилтийн талаар арга зүйн сургалтыг өнөөдөр буюу 2026 оны 11 дүгээр сарын 04-ний өдөр зохион байгууллаа.
Сургалтаар Дотоод хэргийн их сургуулийн Хууль зүйн сургуулийн Нийгмийн ухааны тэнхимийн ахлах багш, дэд хурандаа Л.Батчулуун “Баримт бичгийн стандарт-2 шинэчилсэн найруулга” сэдвээр дэлгэрэнгүй мэдээлэл өгч, MNS 5140:2026 цуврал стандартын шинэчлэл, агуулга, хэрэгжилт, мөн албан хэрэг хөтлөлтийн хүрээнд баримт бичгийг боловсруулах, бүрдүүлэх, баталгаажуулахтай холбоотой арга зүйн зөвлөмж танилцууллаа.
Тус сургалтад Улсын бүртгэлийн ерөнхий газрын албан хаагчид болон аймаг, дүүргийн Улсын бүртгэлийн хэлтсийн дарга, захиргааны ахлах мэргэжилтэн, бичиг хэргийн эрхлэгч, нярав нар хамрагдав. Орон нутгийн болон алслагдсан гурван дүүргийн холбогдох албан хаагчид цахимаар, Улсын бүртгэлийн ерөнхий газар болон төвийн зургаан дүүргийн албан хаагчид танхимаар оролцов.
Энэхүү сургалтаар албан хаагчид баримт бичиг боловсруулах, бүрдүүлэх, баталгаажуулах шинэчилсэн стандартын талаар мэдлэг, мэдээллээ нэмэгдүүлж, өдөр тутмын үйл ажиллагаандаа хэрэгжүүлэх арга зүйн зөвлөмж авлаа.
