Монгол Улсын Ерөнхийлөгч Ухнаагийн Хүрэлсүх Төв аймгийн иргэдтэй уулзах үеэр улс орныхоо хөгжил дэвшилд үнэтэй хувь нэмэр оруулж, ажил үйлсээрээ манлайлан ажилласан нэр бүхий иргэдийг төрийн дээд одон, медалиар шагналаа.
Энэ үеэр Төв аймгийн Улсын бүртгэлийн хэлтсийн дарга Н.Энхбатыг ''Хөдөлмөрийн хүндэт медаль''-аар шагнажээ. Тэрбээр Төрийн захиргааны албанд 17 жил, үүнээс Улсын бүртгэлийн байгууллагад 11 жил тасралтгүй ажиллаж байна.
.jpg)
Түүний болон хамт олны зүгээс хэрэгжүүлсэн онцлох ажлуудаас дурдвал:
- Төв аймгийн Улсын бүртгэлийн хэлтсийг 2016 оноос хойш удирдах хугацаандаа 2019 онд шинэ байрыг ашиглалтад оруулж, албан хаагчдын ажиллах орчин нөхцөлийг сайжруулан, иргэдэд тав тухтай үйлчилгээ үзүүлэх боломжийг бүрдүүлсэн байна.
- Түүнчлэн аймгийн 27 сумыг иргэний улсын бүртгэлийн онлайн сүлжээнд холбох ажлыг амжилттай хэрэгжүүлснээр иргэний улсын бүртгэлийн 10 төрлийн үйлчилгээ болон лавлагааг сумын түвшинд харьяалал харгалзахгүй, шуурхай авах нөхцөлийг бүрдүүлжээ.
- Тэрээр Монгол Улсын Их Хурлын сонгууль, Монгол Улсын Ерөнхийлөгчийн сонгууль болон орон нутгийн сонгуулиудын үеийн улсын бүртгэлийн үйл ажиллагааг аймгийн хэмжээнд амжилттай удирдан зохион байгуулж, зөрчил дутагдалгүй ажилласан бөгөөд байгууллага нь үйл ажиллагааны үр дүнгээрээ улсдаа тэргүүлсэн амжилтуудыг удаа дараа гаргаж байжээ.
