Дундговь аймгийн Засаг даргын 2026 оны 03 дугаар сарын 12-ны өдрийн А/152 дугаар захирамжийн хэрэгжилтийг хангах хүрээнд “Гэр бүлийн өдөр”-ийн ээлжит арга хэмжээг “Мэргэжил сонголт” сэдвээр амжилттай зохион байгууллаа.
Тус захирамжийн дагуу сар бүрийн эхний долоо хоногийн баасан гарагийг “Гэр бүлийн өдөр” болгон тэмдэглэж, ажилтан, албан хаагчдын гэр бүлийн оролцоог дэмжсэн олон талт арга хэмжээг үе шаттай хэрэгжүүлж байна. 4 дүгээр сарын арга хэмжээнд байгууллагын албан хаагчдын хүүхдүүд хамрагджээ.
Арга хэмжээний үеэр сурагчдад байгууллагын үйл ажиллагаа, хэлтсийн чиг үүрэг, төрийн албаны ажлын онцлогийг танилцуулж, ирээдүйн мэргэжлээ зөв сонгоход анхаарах асуудлуудын талаар мэдээлэл өглөө. Түүнчлэн хувь хүний сонирхол, ур чадвар, үнэт зүйлд нийцсэн мэргэжил сонголт хийхийн ач холбогдлыг онцолж, харилцан ярилцлага өрнүүлсэн нь оролцогчдод бодит ойлголт, чиг баримжаа олгосон үр дүнтэй үйл ажиллагаа боллоо.
Мөн хөдөлмөрийн зах зээлийн эрэлт хэрэгцээ, ажлын байрны шаардлага, хувь хүний хөгжлийн чиг хандлагын талаар мэдээлэл хүргэснээр сурагчид ирээдүйн зорилгоо тодорхойлох, мэргэжлийн чиг баримжаагаа зөв төлөвшүүлэхэд чухал дэмжлэг үзүүлэв.
Арга хэмжээний төгсгөлд хэлтсийн дарга сурагчдад дурсгалын зүйл гардуулж, сурлага хөдөлмөрт нь өндөр амжилт хүсэн ерөөв.
Цаашид Гэр бүлийн зөвлөлөөс батлагдсан хуваарийн дагуу ажилтан, албан хаагчдын гэр бүлийн оролцоог нэмэгдүүлэх, байгууллагын эерэг соёл, харилцаа хандлагыг төлөвшүүлэх, гэр бүлийн боловсролыг дэмжих чиглэлээр тогтмол арга хэмжээг зохион байгуулахаар төлөвлөж байна.
