Улсын бүртгэлийн байгууллагын удирдах ажилтны нэгдсэн зөвлөгөөн болж байна. Зөвлөгөөнд Улсын бүртгэлийн ерөнхий газрын удирдлагууд, 21 аймаг, 9 дүүргийн Улсын бүртгэлийн хэлтсийн дарга нар оролцож байна.
Зөвлөгөөний үеэр Хууль зүй, дотоод хэргийн яамны Төрийн нарийн бичгийн дарга Н.Мягмар, Төрийн захиргааны, удирдлагын газрын дарга Г.Эрдэнэбулган нар мэндчилгээ дэвшүүлж, улсын бүртгэлийн байгууллагын үйл ажиллагааны үр нөлөө, цаашдын зорилтын талаар санал бодлоо илэрхийллээ.
Энэхүү удирдах ажилтнуудын зөвлөгөөнөөр 2025 онд хийж хэрэгжүүлсэн ажлын үр дүнг дүгнэж, 2026 онд хэрэгжүүлэх онцлог ажил, бодлого, арга хэмжээний талаар хэлэлцэн нэгдсэн ойлголт, чиглэлд хүрэх зорилготой юм.
Мөн улсын бүртгэлийн үйлчилгээний чанар, хүртээмжийг сайжруулах, байгууллагын дотоод зохион байгуулалт, удирдлагын чадавхыг бэхжүүлэх чиглэлээр мэдээлэл солилцож, туршлага хуваалцана.
Улсын бүртгэлийн байгууллага 2026 оныг “Боловсрол, бүтээмжийг дээшлүүлэх жил” болгон зарлалаа. Албан хаагчдын мэдлэг, ур чадварыг дээшлүүлэх, бүртгэлийн үйлчилгээний чанар, хүртээмжийг нэмэгдүүлэх, өгөгдлийн найдвартай байдлыг хангах, шийдвэр гаргалтын үр ашгийг сайжруулах зорилгоор бүртгэлийн үйл ажиллагаанд хиймэл оюун ухаанд суурилсан технологийг үе шаттайгаар нэвтрүүлэх чиглэлээр зөвлөлдөж байна.
