Иргэд ипотекийн барьцаа хөрөнгөө бүртгүүлэх гэж улсын бүртгэл рүү явдгийг болиулах, цахимжуулах чиглэлд ажиллана

Улсын бүртгэлийн ерөнхий газрын Эд хөрөнгийн эрхийн улсын бүртгэлийн газар болон Монголын ипотекийн корпорацийн төлөөллүүд өнөөдөр (2026.02.12) уулзаж, байгууллага хоорондын мэдээлэл солилцоог илүү хялбаршуулах, цахимжуулах, иргэдэд явдал чирэгдэл багатайгаар хэрхэн шийдэх талаар санал солилцов.

Ипотекийн зээлийн барьцаа хөрөнгөө улсын бүртгэлд бүртгүүлэх эсвэл чөлөөлүүлэхээр иргэд улсын бүртгэлийн байгууллага дээр заавал биечлэн ирдэг, цаг хугацаа зарцуулдаг асуудлыг цахимжуулах, иргэд зөвхөн банкин дээрээсээ ажлаа амжуулаад буцдаг байх зохицуулалтыг хууль эрх зүйн шинэчлэлийн хүрээндээ тусгахаар зорин ажиллаж буйгаа бүртгэлийн байгууллагын зүгээс илэрхийллээ.

Мөн “Хөрөнгөөр баталгаажсан үнэт цаасны хөрөнгийн багц”-ыг бүртгэх ажлыг илүү шуурхай, хялбар болгох, мэдээлэл солилцоог сайжруулах, цахимжуулах, албан хаагчдын механик ачааллыг бууруулах чиглэлд хоёр талаас хамтран ажиллахаар болов.

Уулзалтад УБЕГ-ын Эд хөрөнгийн эрхийн улсын бүртгэлийн газрын даргын албан үүргийг түр орлон гүйцэтгэгч Д.Болормаа, Мэдээллийн технологийн газрын мэргэжилтэн Э.Мөнхжин, Улсын бүртгэгч Э.Сувд-Эрдэнэ, Монголын ипотекийн корпорацийн Үнэт цаасжуулалтын газрын захирал Т.Гансамбуу, Мэдээллийн технологийн газрын захирал н.Бат-Өлзий болон холбогдох мэргэжилтнүүд оролцлоо.