E-Business системийн хуулийн этгээдийн нэр баталгаажуулах үйлчилгээнд хиймэл оюун ухаанд суурилсан (AI) технологийг амжилттай нэвтрүүллээ.
Энэхүү шинэчлэлээр бизнес эрхлэгчид сонгосон хуулийн этгээдийн нэр давхардсан, бүртгэлтэй эсэх, мөн ижил төстэй нэр байгаа эсэхийг хиймэл оюуны тусламжтайгаар шуурхай, хялбар шалгах боломжтой боллоо. Ингэснээр нэр баталгаажуулах үйл явц илүү хурдан, цаг хугацаа хэмнэсэн, хүртээмжтэй болж байна.
Өмнө нь иргэн, хуулийн этгээд нэр авах хүсэлтийг улсын бүртгэлийн байгууллагад биечлэн гаргадаг байсан бол одоо улсын бүртгэгчийн оролцоогүйгээр, гар утасны E-Business аппликейшнээр дамжуулан хиймэл оюун ухааны тусламжтайгаар нэрийн давхардал, ижил төстэй байдлыг урьдчилан шүүн шалгах боломж бүрдлээ.
Энэхүү дэвшилтэт шийдэл нь нэг талаас иргэн, хуулийн этгээдийн нэр баталгаажуулах процессыг хурдасгаж, нөгөө талаас улсын бүртгэгчийн мэдээллийн санд нэрийн давхцал шүүн баталгаажуулах ажлыг хөнгөвчлөх олон давуу талтай юм.
