“Эд хөрөнгийн эрхийн улсын бүртгэлийн хөтлөх үйл ажиллагаанд гэмт хэрэг, зөрчлөөс урьдчилан сэргийлэх нь” сэдэвт сургалт боллоо

Улсын бүртгэлийн ерөнхий газрын Эд хөрөнгийн эрхийн улсын бүртгэлийн газрын улсын бүртгэгч, улсын ахлах бүртгэгч нар, мөн Нийслэлийн 9 дүүрэг болон 21 аймгийн Улсын бүртгэлийн хэлтсийн эд хөрөнгийн эрхийн улсын бүртгэгч, улсын ахлах бүртгэгч нар өнөөдөр /2025.12.18/ танхим болон цахим хэлбэрээр сургалтад хамрагдлаа.

Тус сургалтыг УБЕГ-ын дарга Д.Давааням нээж, үргэлжлүүлэн УБЕГ-ын Эд хөрөнгийн эрхийн улсын бүртгэлийн газрын даргын албан үүргийг түр орлон гүйцэтгэгч Д.Болормаа, Эд хөрөнгийн эрхийн улсын ахлах бүртгэгч Э.Отгонтунгалаг, Хяналт шалгалтын газрын хяналтын улсын ахлах байцаагч Н.Анхбаяр  нар “Эд хөрөнгийн эрхийн улсын бүртгэлийн үйл ажиллагаанд гарч байгаа нийтлэг зөрчил, анхаарах асуудал”,“Эд хөрөнгийн эрхийн улсын бүртгэлтэй холбоотой анхаарах асуудал” зэрэг сэдвийн хүрээнд илтгэж албан хаагчдын асуусан асуултад хариулт өгч, бусад холбогдох мэдээллийг хүргэв.

Мөн анхаарах асуудлын хүрээнд албан хаагчид авлига, ашиг сонирхлоос ангид байх дээр хатуу анхаарч, нэгж дээр ажиллаж буй хэлтсийн дарга, ахлах, тасгийн дарга нар үйл ажиллагааны хяналтаа сайжруулахыг үүрэг болголоо.

Цаашид бүртгэлийн үйлчилгээг үзүүлэхэд улсын бүртгэгч нарт ч, иргэд, аж ахуй нэгжид ч хүндрэл, тодорхойгүй байдал үүсгэж буй хуулийн зохицуулалтгүй, салбар хоорондын уялдаагүй бүрдүүлбэр, баримт бичгүүдийн нэр төрлийг үйлчилгээ бүрээр нягтлан шалгаж, цэгцлэх, мөн шаардлагатай зарим үйлчилгээг яаралтайгаар үзүүлэх асуудлыг судалж, хууль эрх зүйн хүрээнд шийдүүлэхээр зорьж байгаагаа танилцуулав.