Улсын бүртгэлийн хууль тогтоомжийг хэрэгжүүлэх, байгуулаггын үйл ажиллагааг бэхжүүлэх үйлсэд үнэтэй хувь нэмэр оруулж, идэвх зүтгэл гарган тус байгууллагадаа 24 жил ажилласан гавьяаг нь үнэлж Хууль зүй, хяналт шинжилгээ, үнэлгээний хэлтсийн мэргэжилтэн Бадмаанямбуугийн Өэлүн-Үжинг байгууллагын “Хүндэт дэвтэр”-т нэрийг нь бичиж, хүндэтгэл үзүүлэх үйл ажиллагааг 2025 оны 12 дугаар сарын 01-ний өдөр зохион байгууллаа.
Б.Өэлүн-Үжин нь 1998 онд “Мон-Оса” ХХК-д ерөнхий нягтлан бодогчоор ажлын гараагаа эхлүүлж 2001 онд “Иргэний бүртгэл, мэдээллийн улсын төв”-д тооцооны нягтлан бодогчоор ажиллаж улсын бүртгэлийн байгууллагатай анх холбогдож байсан түүхтэй. Үүний дараа 2005-2009 онд Санхүүгийн тасгийн дарга бөгөөд ерөнхий нягтлан бодогч, 2009-2014 онд Улсын бүртгэлийн ерөнхий газрын Санхүүгийн хэлтсийн дарга, 2016-2018 Хяналт шинжилгээ, үнэлгээний газрын мэргэжилтэн, 2018-2020 Санхүү төлөвлөлтийн газрын ахлах мэргэжилтэн, 2020-2021 онд Санхүү төлөвлөлтийн газрын даргын албан үүргийг түр орлон гүйцэтгэгч, 2021-2025 онд Санхүү, аж ахуйн хэлтсийн даргаар, 2025-аас одоог хүртэл Хууль зүй, хяналт шинжилгээ, үнэлгээний хэлтсийн мэргэжилтнээр ажиллаж байна.
Ажиллаж байх хугацаандаа Улсын бүртгэлийн байгууллагын “Хүндэт жуух”, Хууль зүйн яамны “Жуух бичиг”, Сангийн яамны “Жуух бичиг”, Санхүү, банкны тэргүүний ажилтан, Хууль зүйн албаны тэргүүний ажилтан, Улсын бүртгэлийн тэргүүний ажилтан, Нягтлан бодох бүртгэлийн “Тэргүүний ажилтан”, “Хөдөлмөрийн хүндэт” медаль, “Алтан гадас” одон, “Хөдөлмөрийн гавьяаны улаан тугийн одон” зэрэг цол, тэмдэгээр шагнагдаж байв.
Б.Өэлүн-Үжин: “Миний хувьд Улсын бүртгэлийн байгууллагадаа 24 дахь жилдээ ажиллаж байна. Гавьяаныхаа амралтад гарч буй энэ цаг мөчдөө “Хүндэт дэвтэр”-т бичигдэж байгаа минь нэр төрийн хэрэг юм. Бүртгэлийн байгууллага маань хүний төрөх, гэрлэх, эд хөрөнгөтэй болох зэрэг олон сайхан үйлийг бүтээдэг, хүмүүсийг баярлуулдаг буянтай байгууллагад ажиллаж байснаараа үргэлж бахархаж явах болно. Хамт олон минь үргэлж өөдлөн дэвжиж, та бүхний минь ажил үйлс дандаа бүтэж, эрүүл энх, аз жаргалтай байж, сайхан бүхэн биелж байхын ерөөл өргөе” гэлээ.
Энэ үеэр Санхүү, үйлчилгээний хэлтсийн ахмад ажилтан, нягтлан бодогч А.Наранцэцэг, нярав Г.Эрдэнэтунгалаг нарт мөн хүндэтгэл үзүүлэв.
