Улсын бүртгэлийн байгууллага үүсэж хөгжсөний түүхт 85 жилийн ойн хүрээнд Баянзүрх дүүргийн Улсын бүртгэлийн хэлтсийг онцолж байна.
Хэлтсийн дарга П.Мөнхбаатар: “Баянзүрх дүүрэг улсын бүртгэлийн үйлчилгээний хүртээмжийг шинэ түвшинд гаргалаа”
Иргэдэд үзүүлж буй үйлчилгээ болоод цахимжилтын давуу талыг та юу гэж харж байна вэ?
Улсын бүртгэлийн үйлчилгээг цахимжуулах бодлого эрчимтэй хэрэгжиж буй энэ цаг үе нь иргэдэд хүрэх үйлчилгээний хүртээмж, чанарыг улам нэмэгдүүлж, төрийн засаглалын соёл шинэ шатанд гарах үндсийг бүрдүүлж байна.
Иргэн, хуулийн этгээдэд төрийн үйлчилгээг илүү түргэн шуурхай, ил тод хүргэх зорилтын хүрээнд Баянзүрх дүүргийн Улсын бүртгэлийн үйлчилгээний хүртээмжийг үе шаттайгаар нэмэгдүүлэх ажлыг эрчимтэй хэрэгжүүлж байна. Энэ хүрээнд нэг цэгийн үйлчилгээний шинэ цэгүүдийг байгуулж, иргэдэд төрийн үйлчилгээг ойртуулах хүртээмжтэй үйлчлэх нөхцөлийг бүрдүүлсэн. Мөн улсын хэмжээнд анхдагч байдлаар Эд хөрөнгийн эрхийн бүртгэл, тухайлбал /Ипотек /барьцааны гэрээний үйлчилгээг ажлын 1 өдөрт багтаан хөтлөх ажлыг хэрэгжүүлсэн. Энэ нь төрийн үйлчилгээний хүртээмж, шуурхай байдлыг сайжруулснаар иргэд, аж ахуйн нэгжийн бизнесийн орчны дээшлүүлэх, цаг хугацаа болон эдийн засгийн зардлыг хэмнэсэн цогц шийдлүүдийг амжилттай нэвтрүүлж байна.
Сүүлийн жилүүдэд танай байгууллагаас хэрэгжүүлсэн онцлох ажил юу вэ?
Төрийн үйлчилгээний чанар, шуурхай байдлыг сайжруулах бодлогын хүрээнд “төрийн мэдээллийн сангаас гарах боломжтой лавлагаа, мэдээллийг иргэдээс шаардахгүй байх” зарчмыг хэрэгжүүлж, технологийн дэвшлийг төрийн үйлчилгээнд өргөнөөр ашиглаж эхэллээ. Үүний нэг чухал хэсэг нь төрийн мэдээлэл солилцооны ДӨТ–КИОСК төхөөрөмжүүдийг дүүргийн 40 хороонд, Баянзүрх дүүргийн Цагдаагийн газарт байршуулсан явдал юм. Ингэснээр иргэд улсын бүртгэлийн бүх төрлийн лавлагааг хормын дотор авах боломжийг бүрдүүлж, үйлчилгээний хүртээмжийг эрс нэмэгдүүлээд байна.
Ил тод, ухаалаг засаглалыг төлөвшүүлэх зорилтын хүрээнд иргэд долоо хоногийн 7 өдөр, өдрийн 24 цагийн турш өөртөө үйлчлэх боломжтой “24/7 цахим үйлчилгээ”-ний цэгүүдийг Баянзүрх дүүргийн ЗДТГ-ын байр болон Дүнжингаравын нэгдсэн үйлчилгээний төвд ажиллуулж эхэлсэн нь дүүргийн иргэдийн дунд өргөн хүртээмжтэй үйлчилгээ болсон.
Та ажиллаж байх хугацаандаа хамгийн тод харсан өөрчлөлт, ахиц дэвшил юу байна вэ?
Дүүргийн хэмжээнд улсын бүртгэлийн 5 нэг цэгийн үйлчилгээний төв байгуулагдаж, иргэн, эд хөрөнгө, хуулийн этгээдийн бүх төрлийн бүртгэлийн үйлчилгээг нэг дороос авах нөхцөлийг бүрдүүлсэн. Энэ нь иргэдийн цагийг хэмнэх, төрийн байгууллагын хүнд суртлыг бууруулах, үйлчилгээний соёлыг сайжруулахад чухал ач холбогдолтой шийдэл болсон. Үүнээс гадна улсын хэмжээнд анх удаа ипотек (барьцаа)-ийн бүртгэлийг ажлын 1 өдөрт багтаан шийдвэрлэх шинэчлэлийг санаачлан хэрэгжүүлж, УБЕГ-ын даргын зөвлөлөөр хэлэлцүүлэн батлуулсан. Энэхүү шинэ журам нь хууль тогтоомжийн шаардлагыг бүрэн хангасан тохиолдолд барьцаа, ипотекийн гэрээний бүртгэлийг нэг өдрийн дотор шийдвэрлэдэг болсноор иргэд болон бизнесийн байгууллагуудад томоохон дэвшил авчирч байна. Энэхүү шинэчлэл нь хүлээгдэл чирэгдлийг багасгаж, бизнесийн орчныг дэмжиж, иргэдийн цаг хугацааг хэмнэх бодит үр нөлөөтэй төдийгүй улсын бүртгэлийн үйлчилгээг цахимжилт, хүртээмж, ил тод байдлын шинэ шатанд гаргаж буй томоохон ахиц боллоо.
Улсын бүртгэлийн байгууллагын ирэх 5–10 жилийн хөгжлийн хандлага?
Монгол Улсын төрийн үйлчилгээг цахимжуулах бодлого эрчимтэй хэрэгжиж буй энэ цаг үе нь иргэдэд хүрэх үйлчилгээний хүртээмж, чанарыг улам нэмэгдүүлж, төрийн засаглалын соёл шинэ шатанд гарах үндсийг бүрдүүлж байна. Энэхүү хөгжлийн чиг хандлагын хүрээнд улсын бүртгэлийн байгууллагын цаашдын 5–10 жилийн шинэчлэлийн зураглал улам бүр тодорхой болж, технологийн дэвшилд тулгуурласан шинэ тогтолцоо тогтох нөхцөл бүрдэнэ.
Цахимжилт, хиймэл оюун ухаанд ( AI )суурилсан шинэчлэл:
Ирэх жилүүдэд улсын бүртгэлийн процессууд бүрэн цахим хэлбэрт шилжиж, хиймэл оюун ухаан ашиглан мэдээллийн давхардал, алдаа засварлалт, баталгаажуулалт, эрсдэлийн үнэлгээг автомат горимоор гүйцэтгэх боломж бүрэн бүрдэх юм. Энэ нь:
- Гараар хийх ажиллагааг үндсэндээ халах
- Үйлчилгээний хурдыг эрс нэмэгдүүлэх
- Хүний алдааг бараг тэглэх болон иргэдэд төрийн үйлчилгээг хүртээмжтэй, түргэн шуурхай хүргэх нөхцөлийг бүрдүүлнэ.
- Мэдээллийн аюулгүй байдал, нууцлалын хамгаалалт системийн түвшинд бүрэн хангагдана
Иргэн өөрийн мэдээлэл, бүртгэлийн үйлчилгээг баталгаат гар утас болон дижитал туслахуудаар дамжуулан удирдах боломжтой болж, “Иргэн төрд биш, Төр иргэнд хүрдэг” зарчим бүрэн хэрэгжих нь цаг хугацааны асуудал болоод байна.
Улсын бүртгэл Төрийн бодлогын суурь дата:
Улсын бүртгэлийн байгууллага нь зөвхөн үйлчилгээ үзүүлэгч бус, үндэсний хөгжлийн бодлого, нийгмийн судалгааны үндсэн өгөгдлийг бүрдүүлдэг стратегийн байгууллага юм. “Алсын хараа-2050” урт хугацааны хөгжлийн бодлогыг хэрэгжүүлэхэд Улсын бүртгэлийн үнэн зөв, бүх нийтийг хамарсан мэдээллийн сан онцгой ач холбогдолтой.
Ойрын хугацаанд төрийн байгууллагууд хоорондын мэдээллийн уялдаа бүрэн хангагдаж, нэгдсэн дата сангаас иргэний мэдээллийг бодит цагийн горимоор авах нөхцөл бүрдэнэ. Үүний үр дүнд:
- Олон төрлийн лавлагаа, бичиг баримт шаардах шаардлага үндсэндээ арилж
- Мэдээллийн шинэчлэл бүх системд давхардалгүйгээр автоматаар тусгагдаж
- Ил тод, үр ашигтай түргэн шуурхай болох
- Мэдээллийн хамгаалалт, аюулгүй байдлын стандартыг бүх шатанд мөрдөх
Эд хөрөнгийн эрхийн бүртгэлийн шинэ загвар: Блокчэйн, ухаалаг гэрээ
Эд хөрөнгийн эрхийн бүртгэлийн тогтолцоо ухаалаг гэрээ болон блокчэйн технологид тулгуурлан шинэ шатанд гаргах. Энэ шинэчлэл нь:
- Ипотек, барьцаа болон гэрээний бүртгэлийг 5 минутын дотор автомат горимоор хийх
- Бүртгэлийн мэдээллийг дахин засварлах боломжгүй, бүрэн найдвартай болгох
- Эрсдэлийг бууруулж, бизнесийн орчны итгэлцлийг дээшлүүлэх
- Бүртгэлийг хот төлөвлөлтийн бодлоготой уялдуулах
боломжийг бүрдүүлнэ. - Кибер аюулгүй байдал, мэдээллийн хамгаалалтыг олон улсын түвшинд хүргэх
Хот байгуулалт, хүн амын нүүдэл, шилжилт, өмчлөлийн өөрчлөлт зэрэг бодлогын шийдвэрүүд бодитой хувь нэмэр оруулах өгөгдөлд тулгуурлан илүү нарийвчлалтай судалгаа мэдээлэл гардаг болно.
Амьдралын мөчлөгт суурилсан бүртгэлийн систем:
Улсын бүртгэлийн байгууллага иргэний амьдралын мөчлөг бүрд шаардлагатай бүртгэлийг автоматаар хөтөлдөг болох жишээ нь Төрөл, Гэрлэлт, шилжилт хөдөлгөөн, Орон сууц худалдан авах, өвлөх гэх мэт үйлчилгээнүүд хөгжих байх энэ аюулгүй орчинд бүртгэдэг, найдвартай систем бий болно.
Ирэх 5–10 жил бол улсын бүртгэлийн байгууллагын технологийн шинэ эрин үе юм. Цахимжилт, хиймэл оюун ухаан AI , блокчэйн зэрэг дэвшилтэт технологид тулгуурласан шинэ тогтолцоо бүрэлдсэнээр:
- Давхардал, бичиг баримтын хүндрэл үндсэндээ арилна
- Үйлчилгээний чанар, хүртээмж огцом дээшилнэ
- Мэдээллийн аюулгүй байдал өндөр түвшинд баталгаажина
- Төрийн бодлого дата судалгаанд суурилна
- Иргэн мэдээллийнхээ жинхэнэ эзэн болно.
Улсын бүртгэлийн байгууллага нь Монгол Улсын хөгжлийн бодлого, хот төлөвлөлт, төрийн засаглалын шинэ үеийн иргэн төвтэй, ил тод найдвартай төрийн үйлчилгээний стандартыг тогтоох манлайлагч байгууллага болж хөгжих юм.
Улсын бүртгэлийн байгууллага үүсэж хөгжсөний түүхт 85 жилийн ойн баярын мэндчилгээ:
Улсын бүртгэлийн байгууллага үүсэн байгуулагдсаны түүхт 85 жилийн ой, бүртгэлийн нэгдсэн тогтолцоонд шилжсэний 16 жилийн ой тохиож байна.
Энэ өдрийг тохиолдуулан улсын бүртгэлийн байгууллагад ажиллаж байсан ахмадууддаа, үе үеийн ажилтан, өнөөдөр Монгол Улсын өнцөг булан бүрт ажиллаж буй албан хаагчид, улсын бүртгэгч нартаа чин сэтгэлийн халуун баярын мэндийг өргөн дэвшүүлж, ажил үйлсийн өндөр амжилт, аз жаргал, эрүүл энхийг хүсэн ерөөе.
