Хан-Уул дүүргийн 21 дүгээр хороонд “Улсын бүртгэлийн үйлчилгээний цэг” шинээр нээгдлээ

  1. 2025-11-19
  2. Цаг үе, үйл явдал, Мэдээ,
  3. 73 уншсан
A- A A+
Хан-Уул дүүргийн 21 дүгээр хороонд “Улсын бүртгэлийн үйлчилгээний цэг” шинээр нээгдлээ

Улсын бүртгэлийн байгууллагын 85 жилийн ойг угтаж Хан-Уул дүүргийн 21 дүгээр хороонд Буянт-Ухаа ОУ-ын нисэх онгоцны буудал дахь Хан-Уул дүүргийн Улсын бүртгэлийн хэлтсийн "Улсын бүртгэлийн үйлчилгээний цэг" өнөөдөр /2025.11.19/ шинээр нээгдлээ.

Буянт-Ухаа ОУ-ын нисэх онгоцны буудлын байранд нээгдэж буй тус цэг Хан-Уул дүүргийн 7,8,9,10,12,13,14,16,21,25 дугаар хороодын иргэдэд улсын бүртгэлийн үйлчилгээг үзүүлэхээс гадна ойрхон байрлах аймгуудын иргэдэд ч мөн бүртгэлийн үйлчилгээг авч болох бөгөөд дурдсан хороодод байрлах үл хөдлөх эд хөрөнгийн анхны бүртгэл болон бусад бүртгэлийг харьяалал харгалзахгүй үзүүлэх, иргэний улсын бүртгэл, хуулийн этгээдийн улсын бүртгэлийн үйлчилгээг нэг дороос авах боломжийг бүрдүүлснээрээ онцлогтой юм.

Шинэ төвийн нээлтэнд Буянт-Ухаа олон улсын нисэх буудлын Дэд захирал П.Цогтбаатар, УБЕГ-ын Улсын бүртгэлийн нэгдсэн архивын дарга С.Оюунгэрэл, Хан-Уул дүүргийн Улсын бүртгэлийн хэлтсийн дарга С.Оюун-Эрдэнэ болон Буянт-Ухаа ОУ-ын нисэх онгоцны буудал дахь Хан-Уул дүүргийн Улсын бүртгэлийн хэлтсийн "Улсын бүртгэлийн үйлчилгээний цэг"-ийн албан хаагчид байлцлаа.

УБЕГ-ын Улсын бүртгэлийн нэгдсэн архивын дарга: С.Оюунгэрэл: “Хэдхэн жилийн өмнө дүүрэг болон хороодоор дамжуулж зөвхөн иргэний улсын бүртгэлийн үйлчилгээг иргэдэд үзүүлдэг байсан бол 2022 оноос эхлээд өнөөдрийн байдлаар Улаанбаатар хотын хэмжээнд 28 үйлчилгээний нэгдсэн нэг цэгийг нээсэн байна. Ингэснээр иргэдэд илүү ойртойж харьяалал харгалзахгүй, орон зай харгалзахгүй өөрийн хүссэн үйлчилгээг хаанаас ч авах ийм боломж бүрдсэн. Өнөөдөр шинээр нээгдэж буй энэ төвд зөвхөн тус хорооны иргэд үйлчлүүлээд зогсохгүй бусад баруун бүсийн орон нутгийн иргэдэд ойртож, иргэд энэхүү төвөөсөө бүх төрлийн үйлчилгээг авах боломжтой болсон нь цагаа олсон, орон зайг ашиглаж чадсан 85 жилийн ойг угтаж хийсэн их ач холбогдолтой ажил болж байна”  

     

Энэхүү шинэ цэг нээгдсэнээр Хан-Уул дүүргийн хэмжээнд улсын бүртгэлийн үйлчилгээг иргэдэд хүргэх 5 цэгтэй болоод байна.

Дашрамд дурдахад, Буянт-Ухаа ОУ-ын нисэх онгоцны буудал орчимд хамаарагдах Хан-Уул дүүргийн хороодод нийт 100 мянга орчим иргэд байгаа бөгөөд тухайн хэсэгт хамаарах үл хөдлөх эд хөрөнгийн бүртгэлийн тоо өнөөдрийн байдлаар 76 мянга орчим үл хөдлөх бүртгэлтэй байна.