Улсын бүртгэлийн байгууллага үүсэж хөгжсөний түүхт 85 жилийн ойн хүрээнд Ховд аймгийн Улсын бүртгэлийн хэлтсийг онцолж байна.
Хэлтсийн дарга Ц.Даваахүү: Бидний зорилго иргэдэд хүнд сурталгүй, шударга, хурдан үйлчлэх систем бүрдүүлэх
"Монгол Улсын Ерөнхий сайд асан С.Баярын дэвшүүлсэн “Гурван төгөлдөржилт”-ийн нэг чухал зорилт нь улсын бүртгэлийн байгууллагыг нэгтгэн сайжруулах асуудал байсан. Энэ хүрээнд иргэний бүртгэл мэдээлэл, үл хөдлөх хөрөнгийн бүртгэл, хуулийн этгээдийн бүртгэл гэсэн тусдаа бүтэцтэй байгууллагуудыг нэгтгэж, 2008 онд Улсын бүртгэлийн ерөнхий газар болон орон нутгийн бүртгэлийн хэлтсүүдийг байгуулсан юм.
Ховд аймгийн Улсын бүртгэлийн хэлтэс байгуулагдсан эхэн үед техник хэрэгсэл, мэдээллийн технологийн хангамж дутмаг, ажиллах орчин хязгаарлагдмал байсан ч 2009 онд Мянганы сорилтын сангийн төсөлд хамрагдсанаар нөхцөл байдал эрс сайжирсан. Материаллаг бааз, тоног төхөөрөмж шинэчлэгдэж, цаашдын үйлчилгээг чанаржуулах бат бөх үндэс тавигдсан байдаг.
Бүртгэлийн байгууллагын цахим шилжилтийн суурь үнэлгээ өндөр тавигдсан бөгөөд иргэдэд 3 төрлийн бүртгэлийн үйлчилгээг цахимаар олгох боломж бүрэн бүрдсэн нь төрийн үйлчилгээг цахим хэлбэрт бүрэн шилжүүлэхэд манлайлах нөхцөлийг бий болгож байна.
2023 онд Ховд аймгийн Улсын бүртгэлийн хэлтэс шинэ ажлын байртай болж, албан хаагчид тав тухтай орчинд ажиллах боломжтой болсон. Мөн тус аймгийн 11 сумын улсын бүртгэгч нарт эд хөрөнгө болон хуулийн этгээдийн бүртгэл хөтлөх эрх шинээр олгосноор сумын иргэд үйлчилгээгээ өөрийн нутгаасаа авах боломж бүрдсэн нь томоохон дэвшил болов.
Хэлтсийн байранд 24/7 үйлчилгээ нэвтрүүлснээр иргэд цаг хугацаа, орон зай, зардлаа хэмнэн бүртгэлийн үйлчилгээг авах боломжтой болсон. Үйлчилгээг бодит нотлох баримтад тулгуурлан үзүүлж, баталгаажсан бүртгэлийн мэдээллийг цаасан болон цахим хэлбэрээр хадгаламжийн нэгж болгон үүсгэдэг онцлогтой.
Ховд аймгийн Улсын бүртгэлийн хэлтэс нь иргэдэд төрийн үйлчилгээг үнэн зөв, ойлгомжтой, сэтгэл ханамжтай байдлаар хүргэх зорилготой ажиллаж байна. Цаашид бүртгэлийн үйлчилгээг бүрэн цахимжуулж, хүнд сурталгүй, авлигагүй, цаасгүй, зардалгүй үйлчилгээг төлөвшүүлэхээр зорин ажиллаж байгаа бөгөөд мэргэшсэн, хариуцлагатай албан хаагчдыг бэлтгэн төлөвшүүлэх бодлогоо тууштай баримталж байна".
