Хэлтсийн дарга Б.Баттогтох: Бүртгэлийн байгууллагын шинэчлэл иргэдийн амьдралд бодит өөрчлөлт авчирсан гэдгийг би хамгийн тод мэдэрдэг
Улсын бүртгэлийн байгууллагын түүхт 85 жилийн ойн хүрээнд Увс аймгийн улсын бүртгэлийн хэлтсийг онцолж байна.
Увс аймгийн Улсын бүртгэлийн хэлтэс хэдэн онд байгуулагдсан бэ? Анхны үеийн онцлогийг дурдана уу?
Монгол Улсын Засгийн газрын 2008 оны 78 дугаар тогтоолоор “Бүртгэл, мэдээллийн нэгдсэн тогтолцоог бий болгох үндэсний хөтөлбөр” батлагдаж, бүртгэлийн чиг үүрэг бүхий байгууллагуудыг нэгтгэн шинэ бүтэц, зохион байгуулалтад шилжүүлэх эхлэл тавигдсан.
Энэхүү бодлогын хүрээнд Улсын Их Хурлын 2008 оны 43 дугаар тогтоол, Засгийн газрын 64 дүгээр тогтоолоор Улсын бүртгэлийн ерөнхий газрыг байгуулах шийдвэр гарч, үүний дагуу Увс аймгийн Улсын бүртгэлийн хэлтэс 2009 оны 06 дугаар сарын 05-нд албан ёсоор байгуулагдсан.
Ингэснээр аймгийн Засаг даргын Тамгын газрын дэргэд үйл ажиллагаа явуулж байсан Иргэний бүртгэл мэдээллийн алба, Эд хөрөнгийн эрхийн бүртгэлийн алба, Татварын хэлтсийн хуулийн этгээдийн бүртгэлийн нэгжүүдийг нэгтгэн, нэгдсэн удирдлага бүхий бүтэц бүрдэж, анхны даргаар Д.Энхтуяа ажиллаж байсан юм.
Энэ үеийн хамгийн том зорилт нь аймгийн зуун мянга гаруй иргэний бичиг баримтыг цэгцлэх, иргэн бүрийг үнэмлэхжүүлэх ажлыг өргөн хүрээнд хэрэгжүүлэх байсан нь байгууллагын түүхэн гарааны онцлог болж үлдсэн.
Та байгууллагадаа ажиллаж байх хугацаандаа хамгийн тод харсан өөрчлөлт юу байв?
Хамгийн тод мэдэрсэн өөрчлөлт бол төрийн үйлчилгээний чанар, хүртээмжийн томоохон ахиц юм. Өмнө нь иргэд олон цагаар дугаарлаж, бичиг баримтаа бүрдүүлэхэд төвөгтэй байсан бол өнөөдөр цахим үйлчилгээ нэвтэрснээр илүү хөнгөн, шуурхай болжээ. Мөн ажиллах орчин сайжирч, хамт олны мэргэжлийн ур чадвар, хариуцлага мэдэгдэхүйц өссөн. Шинэчлэлийн үр дүнд иргэдийн төрийн байгууллагад хандах итгэл нэмэгдэж, сэтгэл ханамж сайжирсан нь үнэлэмжтэй өөрчлөлт.
Өөрөөр хэлбэл, бүртгэлийн байгууллага өнгөрсөн хугацаанд технологид тулгуурласан, иргэдэд ойр, илүү хүртээмжтэй үйлчилгээтэй байгууллага болж чадсан.
Сүүлийн жилүүдэд танай байгууллагаас хэрэгжүүлсэн онцлох ажил:
Манай байгууллага иргэдийн чирэгдэл, хүндрэл бууруулах чиглэлд онцгойлон анхаарч ажиллаж байна. Иргэн нэг ирэлтээр асуудлаа бүрэн шийдвэрлүүлэх боломж бүрдүүлэхийн тулд:
- Банкны карт уншигч
- “ДӨТ” цахим машин
- Гэрэгэ киоск
- Ухаалаг чатбот
- Оочир дарааллын систем
- Үйлчилгээний үнэлгээний төхөөрөмж гэсэн шийдлүүдийг үе шаттай нэвтрүүлсэн. Ялангуяа ухаалаг чатбот нэвтэрснээр иргэн бүрдүүлэх материалын мэдээллээ цахимаар авч, дахин ирэх шаардлагагүй болсон нь том давуу тал болж байна. Энэ системийг манай мэдээллийн технологийн инженер Г.Батжаргал санаачилсан бөгөөд аймагт төрийн үйлчилгээний чанарыг сайжруулсан шилдэг туршлагад тооцогдон бусад байгууллагад түгээж эхэлсэн.
Танай байгууллагын ажлын онцлог, тулгардаг сорилтууд?
Бүртгэлийн байгууллагын ажил нь иргэн бүрийн эрх, хууль ёсны ашиг сонирхолд шууд хамааралтай учраас өндөр хариуцлага шаарддаг. Нэг алдаа гарвал хүний эрх ашигт нөлөөлөх эрсдэлтэй. Тиймээс бид маш нягт, хуульд нийцсэн ажиллах шаардлагатай.
Сорилтын хувьд:
Орон нутгийн газарзүйн онцлогоос шалтгаалан сүлжээгүй малчин иргэдийг бүртгэлд бүрэн хамруулах
Мэдээллийн аюулгүй байдлыг өндөр түвшинд хангах
Цахим шилжилтийг бүх иргэнд хүртээмжтэй болгох зэрэг бэрхшээл бий. Гэсэн ч хамт олноороо нэг зорилготой байж эдгээрийг даван туулж байна.
Дараагийн 5–10 жилд бүртгэлийн байгууллага ямар чиглэлд хөгжих ёстой вэ?
Ирэх жилүүдэд байгууллага бүрэн цахимжсан, иргэд байгууллагад заавал ирэх шаардлагагүй, утсаа ашиглан бүх үйлчилгээг авах боломжтой болох нь гол зорилт байх ёстой. Хүний нөөцийн чадавхыг тасралтгүй дээшлүүлэх, Харилцаа, үйлчилгээний соёлыг шинэ түвшинд хүргэх, Мэдээллийн аюулгүй байдлыг бүрэн хангах зэрэг чиглэлд хөгжих шаардлагатай.
Өөрөөр хэлбэл, бүртгэлийн байгууллага технологид тулгуурласан, иргэдэд хамгийн ойр төрийн үйлчилгээний загвар байгууллага болон хөгжих учиртай.
