Улсын бүртгэлийн байгууллага үүсэж хөгжсөний түүхт 85 жилийн ойн хүрээнд Сүхбаатар дүүргийн Улсын бүртгэлийн хэлтсийг онцолж байна.
Хэлтсийн дарга Б.Төгс-Эрдэнэ: “Улсын бүртгэл бол таны болон таны өмч, таны хуулийн этгээдийн бүртгэлийг төрд дансалж, нийгмийн болон эрх зүйн харилцаанд орох суурийг тавьдаг чухал байгууллага”
Танай дүүргийн бүртгэлийн хэлтэс хэдэн онд байгуулагдсан бэ? Анхны үеийн түүхээ сэргээн санавал?
Дүүргүүдийн зохион байгуулалтаар 1992 онд иргэний бүртгэлийн 2 ажилтантай болж, Гэрлэх ёслолын ордноос тусгаарлан Сүхбаатар дүүргийн Засаг даргын Тамгын газрын бүрэлдэхүүнд орж, иргэний гэр бүлийн байдлын бүртгэл хөтөлж эхэлсэн байдаг. 2005 оноос Төрийн захиргааны удирдлагын хэлтсийн Иргэний улсын бүртгэлийн тасаг болж 3 орон тоотой ажиллаж байгаад 2011 оноос Улсын бүртгэлийн ерөнхий газрын Нийслэлийн Улсын бүртгэлийн газрын харьяанд Сүхбаатар дүүргийн Улсын бүртгэлийн хэлтэс болон өргөжсөн.
Сүхбаатар дүүрэг нь нутаг дэвсгэрийн хувьд нийслэлийн төвд оршдог, Монгол улсын төр захиргааны томоохон хуулийн этгээд төвлөрсөн дүүрэг юм. Энэ онцлогын хувьд иргэний улсын бүртгэлийн түүхэн цаг үе болох иргэний паспортыг иргэний үнэмлэхээр солих 1989-2000 он, иргэний шинэчилсэн бүртгэл буюу биеийн давхцахгүй өгөгдлийн бүртгэлийн 2010-2012 оны түүхэн шилжилтийн анхдагч бүртгэлүүдийг хийж байсан онцлогтой. Тус дүүргийн нутаг дэвсгэрт үйл ажиллагаа явуулдаг хуулийн этгээд төвлөрсөн, томоохон объектууд ихтэй, хүн амын боловсролын түвшингийн үзүүлэлт өндөр зэрэг онцлогуудаас шалтгаалан удирдах ажилтны болон ажилчдын мэдлэг ур чадвар шаардагдсан бүртгэл ихтэй, тэр хэрээрээ албан хаагчдын мэдлэг чадвар өндөр байсан гэж хувьдаа үнэлэх байна.
Таны одоо ажиллаж байгаа энэ цаг үед хамгийн тод харсан, мэдэрсэн өөрчлөлт, ахиц дэвшил юу байна вэ?
Манай байгууллага бусад төрийн байгууллагуудтай харьцуулахад цахим шилжилтэд анхдагч байж чадаж байгаа гэж харж байна. Мөн иргэн, аж ахуйн нэгжид үзүүлдэг төрийн үйлчилгээг харъяалал харгалзахгүй үзүүлж байгаа нь хамгийн том дэвшил байсан.
Сүүлийн жилүүдэд танай байгууллагаас хэрэгжүүлсэн онцлох ажил юу вэ? Цахимжуулалтын давуу тал?
Улсын бүртгэлийн байгууллагын үйл ажиллагааг иргэдэд илүү ойртуулах зорилгоор нэг цэгийн үйлчилгээг нэвтрүүлэх ажил байсан. Энэ ажлын хүрээнд тус дүүргийн 9 дүгээр хорооны нутаг дэвсгэрт “Их тойруу” худалдааны төв, 13 дугаар хорооны нутаг дэвсгэрт байрлах “CARREFOUR” худалдааны төвд” Сансар-32” нэг цэгийн үйлчилгээний төвийг нээн ажиллуулж байна. Төрийн байгууллагын болон ажлын 5 өдөрт ажилтай иргэд болон хуулийн этгээдэд үйлчилгээ үзүүлэхээр зорилгоор амралтын өдөр буюу Бямба гарагт үйлчилгээ үзүүлдэг ганц цэг нь манай дүүргийн хувьд “Их тойруу” цэг юм.
Цахимжуулалтын хувьд гэвэл иргэн, хуулийн этгээдэд үзүүлдэг үйлчилгээг цахимжуулснаар цаг хэмнэх, албан хаагчдын ачааллыг бууруулах, төсөв, санхүү хэмнэх болон бусад байгууллага хоорондын уялдаа холбоо сайширсан гэх мэт олон давуу талууд бий болсон, энэ ч мэдэгдэхүйц нөлөөлж, эерэгээр харагдаж байгаа гэж ойлгодог.
Иргэдийн оролцоо, хүлээлтийг та ямар түвшинд гэж харж байна вэ?
Тус дүүргийн хувьд дээр дурдсан нутаг дэвсгэрийн байршил, хуулийн этгээдийн байршил мөн томоохон үл хөдлөх эд хөрөнгүүд байрладаг зэргээс хамаарч албан хаагчдаас эрх зүйн мэдлэг чадвар өндөр байхыг шаарддаг. Мөн дүүргийн Тамгын газрынхаа байранд хотын төвд байршилтай гэх давуу талтай учраас дүүрэг, хорооны ажлын албадтай хамтран ажиллаж, иргэдэд хүргэх мэдээ мэдээллээ тухай бүр дамжуулах, иргэдэд зорьсон “нээлттэй хаалга”-ны өдөрлөг зохион байгуулах зэргээр тогтмол иргэдийн оролцоог ханган ажиллаж байна. Мөн иргэдийн оролцоо сайн байхын нэг үндэс нь удирдах албан тушаалтнуудын арга зүй сайн, улсын бүртгэгч нараас нэг ч иргэнийг буцаахгүй асуудлыг хуульд нийцүүлэн шийдвэрлэх, өөрсдийн чиг үүрэгт хамааралгүй, иргэнээс шалтгаалаагүй асуудалд холбогдох байгууллага, албан тушаалтанд хандан шийдвэрлүүлэх боломжийг эрэлхийлж ажилладаг. Тиймээс иргэд бусад төрийн байгууллагуудаас манай байгууллага шиг дээрх үйлчилгээг хүсэх хүлээлт бий болсон байна.
Цаашид ямар зорилго тавин ажиллаж байна вэ?
Улсын бүртгэлийн байгууллага нь иргэн, хуулийн этгээдийн хэрэгцээ шаардлагыг хангасан, олон улсын жишигт нийцсэн, бүрэн цахимжсан байх үндсэн зорилготой. Энэ зорилгыг хэрэгжүүлэн ажиллахын төлөө бид мэдлэг, чадвар, боломжоо бүрэн дайчлан ажиллаж байна.
Улсын бүртгэлийн байгууллагын хамт олондоо болон иргэд үйлчлүүлэгчиддээ 85 жилийн ойн баярын мэндчилгээ дэвшүүлнэ үү?
Юуны түрүүнд 85 жилийн түүхтэй тус байгууллагад ажиллаж байсан, гавьяаны амралтандаа суусан болон одоо ажиллаж байгаа нийт хамт олондоо бүртгэлийн байгууллагын түүхэн цаг үеүдийн нөр их ажлын ард өөрийн мэдлэг чадвар, сэтгэл зүтгэлээ зориулан ажилласанд талархалаа илэрхийлж та бүхэндээ ойн баярын мэнд хүргэе. Улсын бүртгэл таны болон таны өмч, таны хуулийн этгээдийн бүртгэлийг төрд дансалж бүртгэн, иргэн, хуулийн этгээдийг нийгмийн болон эрх зүйн харилцаанд орох суурийг тавьдаг чухал байгууллага билээ. Та өөрийн эрхээ хамгаалуулахаар манай байгууллагыг зорин ирэхэд манай хамт олон ямагт таныг эелдэг найрсагаар хүлээн авч, үнэн зөв бүртгэлийг тань баталгаажуулж өгөх болно. Мөн энэ цаг мөчид хамт ажиллаж байгаа хамт олондоо чин сэтгэлээсээ талархаж, бахархаж явдаг юм. Та бүхэндээ эрүүл эх, аз жаргал, сайн сайхан бүхнийг хүсэн ерөөе.
