Улсын бүртгэлийн байгууллага үүсэж хөгжсөний түүхт 85 жилийн ойн хүрээнд Багахангай дүүргийн Улсын бүртгэлийн хэлтсийг онцолж байна.
Хэлтсийн дарга М.Уранцэцэг: Иргэн таны итгэл, дэмжлэг бол бидэнд хамгийн том үнэ цэн
Багахангай дүүргийн бүртгэлийн хэлтэс хэдэн онд байгуулагдсан бэ? Түүх сөхвөл?
Иргэний бүртгэлийн үйл ажиллагааг хуваагдмал байдлаар орон нутагт төрийн захиргааны байгууллага, цагдаагийн байгууллагууд эрхлэн гүйцэтгэж байсныг Монгол улсын Засгийн газрын 2000 оны 12-р сарын 26-ны өдрийн 198 дугаар тогтоолоор Иргэний бүртгэл, мэдээллийн улсын төвийг Цагдаагийн байгууллагын бие бүрэлдэхүүнээс гаргаж аймаг, нийслэлийн Засаг даргын Тамгын газарт шилжүүлэн ажиллуулах болсноор иргэний бүртгэлийн бүх төрлийн үйл ажиллагаатай холбоотой чиг үүргийг орон нутагт буюу аймаг, нийслэлийн засаг даргын тамгын газарт харъяалуулан нэгтгэн төвлөрүүлсэн байдаг. Ингэснээр Багахангай дүүргийн Засаг даргын тамгын газрын Төрийн захиргааны удирдлагын хэлтсийн харьяанд 2000-2011 оны хооронд нэг хүн, 2011-2012 оны хооронд 2 хүний орон тоотойгоор тус тус үйл ажиллагаагаа явуулж байсан. 2009 онд Улсын Бүртгэлийн байгууллага нэгдмэл тогтолцоонд шилжсэнтэй холбогдуулан Засаг даргын тамгын газрын Төрийн захиргааны удирдлагын хэлтсийн Бүртгэл мэдээллийн тасгийг татан буулгаж Улсын бүртгэлийн ерөнхий газрын даргын 2012 оны 4 дүгээр сарын 09-ний өдрийн 277-р тушаалаар Бүртгэлийн хэлтэс болгон бүтэц зохион байгуулалтыг өөрчлөн 5 хүний орон тоо батлан Нийслэлийн Улсын Бүртгэлийн Газарт шилжүүлсэн. Монгол Улсын Хуульзүй, Дотоод хэргийн сайдын 2025 оны 08 дугаар сарын 27-ны өдрийн А/45 дугаар тушаал “ Улсын бүртгэлийн ерөнхий газрын үйл ажиллагааны стратеги, зохион байгуулалтын бүтцийн өөрчлөлтийн хөтөлбөр, зохион байгуулалтын бүтэц, орон тоо, ангилал, зэрэглэлийг шинэчлэн батлах тухай” бүтэц батлагдаж Нийслэлийн Улсын бүртгэлийн газар татан буугдсанаар Улсын бүртгэлийн ерөнхий газрын даргын 2025 оны 09-р сарын 01-ний өдрийн А/156 дугаар тушаалаар “Дүүргийн Улсын бүртгэлийн хэлтсийн зохион байгуулалтын бүтэц, орон тоо, ангилал, зэрэглэлийг шинэчлэн батлах тухай” бүтэц батлагдан Багахангай дүүргийн Улсын бүртгэлийн хэлтэс нь Улсын бүртгэлийн ерөнхий газрын шууд харьяанд очсон.
Байгууллагын ахиц дэвшил болоод өөрчлөлт шинэчлэлийн талаар цухас дурдвал?
Байгууллагын үйл ажиллагаа цахимжиж, иргэдэд үзүүлэх үйлчилгээний хурд, чанар сайжирсан. Өмнө нь олон шат дамжлагатай, цаасан хэлбэрийн үйл ажиллагаа давамгайлдаг байсан бол өнөөдөр цахимаар түргэн шуурхай, илүү ил тод, хүртээмжтэй болж байгаа нь хамгийн том ахиц юм.
Сүүлийн жилүүдэд танай байгууллагаас хэрэгжүүлсэн онцлох ажил юу вэ?
Багахангай дүүрэг нь анх 1989 онд Улаанбаатар хотын Багахангай хороо болон байгуулагдаж, улмаар нийслэлийн алсагдсан дүүрэг болон өргөжсөн бөгөөд 1293 өрхийн 4550 орчим хүн амтай. Улаанбаатар хотоос зүүн урагш 90км-т, баруун хойд талаараа Төв аймгийн Сэргэлэн сум, зүүн болон урд талаараа Баян сумтай хил залган оршдог, эргэн тойрондоо Баянцагаан, Баянжаргалан, Архуст сумдуудтай залгаа, нийслэлийн алслагдсан дүүргүүдийн нэг. Тус дүүрэгт төсөвт байгууллага 24, нийслэлийн өмчийн үйлдвэрийн газар 4, ХХК 135, хоршоо 6, нөхөрлөл 4, Төрийн бус байгууллага 42, сан 1, бусад 1 гэсэн нийт 220 орчим байгууллага, аж ахуйн нэгж үйл ажиллагаагаа явуулж, татварын төвлөрсөн болон орон нутгийн төсвийн төлөвлөгөөг бүрдүүлж байна. Багахангай дүүрэг нь Улаанбаатар хоттой 107 км төмөр замаар, 90 км хатуу хучилттай хар замаар холбогдсон. Ийм онцлог шинж чанартай учраас бид Улсын бүртгэлийн үйлчилгээг түргэн шуурхай, иргэдэд хүрч үйлчлэх, хүний эрхийг хангах үүднээс явуулын үйлчилгээг зам дагуух төмөр замчдад, малчдад, ахмад настанд, хөгжлийн бэрхшээлтэй иргэдэд, шинэ төрсөн ээжүүдэд, хүнд өвчтэй иргэд, хорих байгууллагын хүмүүжигч нарт харьяалал харгалзахгүй хүргэж ирснээрээ онцлогтой.
Иргэдэд үзүүлж буй цахим үйлчилгээний давуу талуудын талаар та ямар санал, бодолтой байдаг вэ?
Цахим үйлчилгээг нэвтрүүлснээр ажиллаж байгаа ажилтны болон иргэдийн цаг зардлыг хэмнэх, үйлчилгээний хүртээмжийг нэмэгдүүлэх, ил тод байдал, хяналтыг сайжруулах, мэдээллийг найдвартай хадгалах, төрийн үйлчилгээг хурдан шуурхай, үр ашигтай болгосон давуу талтай гэж харж байна. Иргэдийн цахим үйлчилгээг ашиглах мэдлэг, ур чадвар харилцан адилгүй, газарзүйн хувьд алслагдсан учир тэдгээр иргэдэд хүрч үйлчлэх шаардлагатай, хүний нөөцийн тоо цөөн тул ажилтнууд олон чиг үүргийг зэрэг гүйцэтгэх шаардлагатай болдог. Учир нь үйлчлүүлэгчийн тоо бага ч бүртгэлийн үйлчилгээний төрөл адилхан учраас бүрэн хүрч ажиллах нь нэн чухал.
Дараагийн 5-10 жилд бүртгэлийн байгууллага ямар чиглэлд хөгжих ёстой гэж үзэж байна вэ?
Дараагийн 5-10 жилд бүртгэлийн байгууллага цахим шилжилтээ гүнзгийрүүлж, иргэдэд илүү хүртээмжтэй болгох нь зүйтэй. Иргэдийн хүлээлт цахимжсан, шуурхай, ил тод үйлчилгээнд чиглэсэн байгаа ч оролцоог бодитоор нэмэгдүүлэхийн тулд мэдээлэл сургалтыг бид өргөжүүлэх шаардлагатай. Мөн цаашид Хуулийн этгээдийн улсын бүртгэлийн үйлчилгээг дүүрэгтээ жигд хүргэх, бас хэлтсийн байртай болох тал дээр анхаарах хэрэгтэй байна.
Улсын бүртгэлийн байгууллагын хамт олондоо түүхт 85 жилийн ойн баярын мэндчилгээ хүргэх үү?
Улсын бүртгэлийн байгууллагын хамт олон та бүхэнд 85 жилийн ойн халуун мэндийг хүргэе. Бидний хамтын хөдөлмөр, шинэчлэл, бүтээлч сэтгэлгээ иргэн бүрт илүү хүртээмжтэй, найдвартай үйлчилгээг бий болгож байна. Цаашдын ажил нь амжилтаар бялхаж, хамтдаа шинэ түүх бүтээхийн ерөөл дэвшүүье. Түүнчлэн “Улсын бүртгэлийн үйлчилгээг авч бидэнд урмын үг хэлж, итгэл хүлээлгэдэг иргэддээ баярлалаа. Та бүхний итгэл, дэмжлэг бол бидэнд хамгийн том үнэ цэнэ юм. Мөн хамт олныхоо хөдөлмөр, сэтгэл зүрхээ зориулж ирсэн хүчин чармайлтад чин сэтгэлээсээ талархаж байна, цаашид хамтдаа улам ихийг хийж бүтээхийн ерөөл өргөн дэвшүүлье.
