Улсын бүртгэлийн байгууллагын 85 жилийн ойн хүрээнд Орхон аймгийн улсын бүртгэлийн хэлтсийг онцолж байна.
Орхон аймгийн Улсын бүртгэлийн хэлтсийн дарга М.Отгонбаяр: Иргэд урт дараалалд зогсож, бүртгэлээ гараар бичүүлдэг байсан үе ард хоцорчээ
Орхон аймгийн Улсын бүртгэлийн хэлтэс нь Улсын бүртгэлийн ерөнхий газрын даргын 2009 оны 101 дүгээр тушаалаар байгуулагдан өнөөг хүртэл үйл ажиллагаагаа амжилттай явуулж байна.
Тус хэлтсийн үндэс суурь нь 2001 онд тавигдсан бөгөөд тухайн үед аймгийн Засаг даргын 22 дугаар захирамжаар Иргэний бүртгэл, мэдээллийн алба нэртэйгээр ЗДТГ-ын Хуулийн хэлтсийн дэргэд байгуулагдаж, анхны даргаар Х.Цэцгээ томилогдон ажиллаж байв.
Мөн 1997 онд эд хөрөнгийн бүртгэлийн товчоо байгуулагдаж, анхны даргаар н.Баярсайхан ажиллаж байсан бөгөөд тухайн үед Хууль зүйн хэлтэс, татварын алба, эд хөрөнгийн бүртгэлийн газар, Иргэний бүртгэлийн байгууллагууд нэгдэж, улсын бүртгэлийн цогц бүтэц үүссэн юм.
Анхны үед бүртгэлийн бүхий л үйл ажиллагаа гар аргаар хөтлөгдөж, иргэдийн урт дараалал, цаг их зарцуулдаг, бүртгэгч нарын ачаалал өндөр байлаа. Энэ үеийн нөр их хөдөлмөр нь өнөөгийн цахим бүртгэлийн тогтолцооны суурийг тавьсан түүхтэй.
Өөрчлөлт, дэвшил
Байгууллагын хөгжлийн замналд хамгийн том дэвшил нь бүртгэлийн үйлчилгээг цахим хэлбэрт шилжүүлсэн явдал юм.
Иргэн, эд хөрөнгө, хуулийн этгээдийн бүртгэлийг цахим системд нэгтгэж, сонгуулийн ажлыг биеийн давхцахгүй өгөгдлөөр гүйцэтгэдэг болсон нь орон нутгийн бүртгэлийн салбарын хөгжлийн нэг томоохон алхам болсон билээ.
Иргэдэд үзүүлж буй үйлчилгээ ба шинэчлэл
Сүүлийн жилүүдэд хэрэгжүүлсэн онцлох ажлууд:
- Орхон аймгийн Засаг даргын хөрөнгө оруулалтаар эд хөрөнгийн бүртгэлийн архивт 16 ширхэг нягтруулсан шүүгээ, “Цахим төв”-д бүртгэлийн үйлчилгээний ДӨТ киоск машин, зөөврийн 4G төхөөрөмж зэрэг нийт 27 сая төгрөгийн тоног төхөөрөмж суурилуулж, үйлчилгээний хүртээмжийг нэмэгдүүлэв.
- Улсын бүртгэлийн байгууллагын 85 жилийн ойд зориулан 76 сая төгрөгийн урсгал засвар хийж, үйлчилгээний танхим болон архивын тохижилтыг шинэчлэв.
- Иргэний улсын бүртгэлийн 9 бүртгэгчийн тоног төхөөрөмжийг шинэчилж, сканнер, принтерийг бүрэн солилоо.
- Үйлчилгээний хураамжийг 100% цахимаар төлөх боломжийг бүрдүүлж, “Гэрэгэ Пос”, “Гэрэгэ Киоск”, “Бүртгэлийн ДӨТ киоск”-оор хураамж төлдөг болсон.
- Өөрсдийн санаачилгаар хүүхдийн өрөө байгуулж, иргэдэд тав тухтай орчин бүрдүүлэн, хүүхдүүдийг аюулгүй орчинд тоглох нөхцөлтэй болгосон.
Цахим үйлчилгээний ач холбогдол
Цахим бүртгэлийн системийн нэвтрэлт нь иргэдэд цаг хугацаа, орон зайнаас үл хамааран хялбар, хүнд сурталгүй үйлчилгээ авах боломжийг бүрдүүлж байна.
Цаашид бүх төрлийн үйлчилгээ бүрэн цахимжсанаар төрийн үйлчилгээний ил тод байдал улам нэмэгдэх болно.
Аймгийн онцлог, тулгамдсан асуудал
Орхон аймаг нь хүн амын төвлөрөл ихтэй, нийслэлийн дүүргүүдийн адил хэмжээнд төрийн үйлчилгээ үзүүлдэг онцлогтой.
Гэсэн хэдий ч хэлтэс нь одоогоор байнгын байргүй, орон нутгийн өмчийн байранд түрээсийн нөхцлөөр үйл ажиллагаа явуулж байгаа нь тулгамдсан асуудлын нэг юм.
Хөгжлийн зорилт ба ирээдүй
Дараагийн 5–10 жилд бүртгэлийн байгууллага тоон гарын үсэг ашиглан бүх төрлийн үйлчилгээг цахимаар авах бүрэн боломжтой болох зорилготой.
Цаашид иргэдэд авлига, ашиг сонирхлоос ангид, түргэн шуурхай, найдвартай үйлчилгээ үзүүлэх, албан хаагчдын нийгмийн баталгааг сайжруулах чиглэлд зорилго тавин ажиллаж байна.
Ойн мэндчилгээ
85 жилийн түүхтэй Улсын бүртгэлийн байгууллага бол Монгол Улсын хөгжил дэвшлийн итгэлцлийн суурь юм.
Бүртгэлийн байгууллага үүсэж хөгжсөний 85 жил, бүртгэлийн нэгдсэн тогтолцоонд шилжсэний 16 жилийн ойн баярын мэндийг салбарынхаа нийт хамт олон, ахмад зүтгэлтнүүддээ өргөн дэвшүүлье.
