Завхан аймгийн Улсын бүртгэлийн хэлтсийн дарга Ж.Сүхбаатар: Цахимжилт бол бүртгэлийн үйлчилгээг иргэн бүрт хүргэх шинэ шат юм
Улсын бүртгэлийн байгууллагын 85 жилийн ойн хүрээнд Завхан аймгийн улсын бүртгэлийн хэлтсийг онцолж байна.
– Танай аймаг/дүүргийн Улсын бүртгэлийн хэлтэс хэдэн онд байгуулагдсан бэ? Анхны үеийн онцлогийг дурдвал?
Монгол Улсын Засгийн газрын 2008 оны 78 дугаар тогтоолоор “Монгол Улсад бүртгэлийн нэгдсэн тогтолцоог бий болгох үндэсний хөтөлбөр”-ийг баталсан. Энэ хүрээнд Засгийн газрын 2008 оны 64 дүгээр тогтоолоор Засгийн газрын хэрэгжүүлэгч агентлаг - Улсын бүртгэлийн ерөнхий газрыг байгуулсан нь орон нутгийн улсын бүртгэлийн байгууллагуудыг шинээр байгуулах суурь болсон юм.
Үүний дараа Улсын бүртгэлийн ерөнхий хуулийг 2009 оны 6 дугаар сарын 25-нд баталснаар орон нутгийн бүртгэлийн хэлтсүүдийг байгуулах эрх зүйн орчин бүрдэж, Завхан аймгийн Улсын бүртгэлийн хэлтэс 2009 оны 7 дугаар сарын 1-ний өдөр албан ёсоор байгуулагдсан түүхтэй.
– Та ажиллаж байх хугацаандаа хамгийн тод харсан өөрчлөлт, ахиц дэвшил юу байв?
Сүүлийн жилүүдэд бүртгэлийн үйлчилгээг цахимжуулах ажил эрчимтэй өрнөж байна. Иргэд e-Mongolia болон бусад цахим системээр дамжуулан бүртгэлийн үйлчилгээ авах боломжтой болсон нь том ахиц юм. Мөн зөөврийн тоног төхөөрөмж ашиглан алслагдсан баг, сумдын иргэдэд бүртгэлийн үйлчилгээ хүргэдэг болсноор зорилтот бүлгийн иргэдэд илүү ойртож чадсан гэж үздэг.
– Танай байгууллагын сүүлийн жилүүдэд хэрэгжүүлсэн онцлох ажлыг дурдвал?
Завхан аймгийн Улсын бүртгэлийн хэлтэс нь 2023 оны 5 дугаар сард шинэ байранд нүүн орсон. Ингэснээр төрөлжсөн архивын хадгалалт, хамгаалалт сайжирч, ажилтан, албан хаагчдын ажиллах орчин нөхцөл шинэ түвшинд хүрсэн. Энэ нь иргэдэд үзүүлэх бүртгэлийн үйлчилгээний чанар, хүртээмжийг мэдэгдэхүйц нэмэгдүүлсэн томоохон алхам болсон.
– Цахим бүртгэлийн үйлчилгээний давуу талуудын талаар та ямар байр суурьтай байдаг вэ?
Манай аймаг 2019 онд бүх сумуудаа улсын бүртгэлийн нэгдсэн онлайн сүлжээнд бүрэн холбож дуусгасан анхны аймаг болсон. Үүний үр дүнд иргэд харьяалал харгалзахгүйгээр бүртгэлийн үйлчилгээ авах боломжтой болж, үйлчилгээний хугацаа, шат дамжлагыг багасгаж чадсан. Энэ бол бүртгэлийн байгууллагын хөгжлийн чухал дэвшил юм.
– Танай аймгийн бүртгэлийн байгууллагын ажилд тулгамддаг онцлог, сорилт юу байдаг вэ?
Завхан аймаг газар нутгийн хувьд өргөн уудам, уулархаг бүс нутаг тул зарим сум аймгийн төвөөс хол зайд байрладаг. Энэ нь цаг уур, зам тээврийн нөхцлөөс шалтгаалан иргэдэд үйлчилгээ хүргэхэд хүндрэл үүсгэдэг. Мөн алслагдсан сумдын интернет холболт муу байдаг нь мэдээллийн системд нэвтрэхэд саад болдог тул тасралтгүй онлайн холболтыг хангах нь бидний тулгамдсан асуудлын нэг юм.
– Иргэдийн оролцоо, хүлээлтийг та хэрхэн харж байна вэ?
Иргэд бүртгэлийн үйлчилгээний ач холбогдлыг улам бүр ойлгодог болж, цахим үйлчилгээ ашиглах нь нэмэгдэж байна. Гэсэн ч алслагдсан сумдын иргэдийн цахим хэрэглээ сул байгаа нь бидний анхаарах нэг чиглэл юм. Цахимжуулалтыг улам өргөжүүлснээр иргэдэд хүрэх үйлчилгээ илүү хүртээмжтэй, тэгш болно гэж итгэдэг.
– Дараагийн 5–10 жилд бүртгэлийн байгууллага ямар чиглэлд хөгжих ёстой гэж та үздэг вэ?
Бүртгэлийн байгууллага иргэдэд бүрэн цахим, найдвартай, хүртээмжтэй үйлчилгээ үзүүлдэг болох ёстой. Үүнд бүх төрлийн бүртгэлийг нэгдсэн цахим системд нэгтгэх, иргэд иргэний үнэмлэх эсвэл цахим гарын үсгээр төрийн үйлчилгээ авах боломжийг бүрэн бүрдүүлэх, гар утасны аппликейшн ашиглан бүртгэлийн үйлчилгээ авах нөхцөл бий болгох нь зүйтэй. Мөн давхардсан, зөрчилтэй бүртгэлийг бүрэн арилгаж, байгууллага хоорондын мэдээлэл солилцоог сайжруулах шаардлагатай.
– Та хувийн болон байгууллагынхаа ирээдүйн зорилгоос хуваалцана уу.
Хувь хүний хувьд мэргэжлийн ур чадвараа тасралтгүй хөгжүүлж, техник технологийн шинэчлэлд дасан зохицон суралцахыг зорьдог.
Байгууллагын хувьд иргэн төвтэй төрийн үйлчилгээг бий болгож, ажилтан, албан хаагчдын мэдлэг, ёс зүй, соёлыг дээшлүүлэх, цахимжуулалтыг эрчимжүүлж, алслагдсан сумдын хүртээмжийг нэмэгдүүлэхэд анхаарч ажиллаж байна.
– Эцэст нь, улсын бүртгэлийн хамт олондоо хандан ойн баярын мэндчилгээ дэвшүүлнэ үү.
Жил бүрийн 11 дүгээр сарын 23-ны өдрийг “Улсын бүртгэлийн ажилтны өдөр” болгон тэмдэглэдэг уламжлалтай. Монгол Улсад бүртгэлийн тогтолцоо үүсэж хөгжсөний 85 жилийн ойн энэ өдөр үе үеийн ажилтан, албан хаагчид, ахмад буурлууддаа баярын гүн талархал илэрхийлье. Та бүхний бүтээлч хөдөлмөрөөр улсын бүртгэлийн салбар хөгжлийн олон үеийг туулж, иргэн бүрт хүрэх төрийн үйлчилгээний чанарыг шинэ шатанд гаргаж чадсан билээ. Түүхт ойн баярын мэндийг хүргэе!
