Улсын бүртгэлийн байгууллага үүсэж хөгжсөний түүхт 85 жилийн ойн хүрээнд Дундговь аймгийн Улсын бүртгэлийн хэлтсийг онцолж байна.
– Танай аймгийн Улсын бүртгэлийн хэлтэс хэзээ байгуулагдсан бэ? Анхны үеийн онцлогийг дурдана уу.
– Дундговь аймгийн Улсын бүртгэлийн хэлтэс нь Монгол Улсын Засгийн газрын 2008 оны 64 дүгээр тогтоолоор захиргаа, аж ахуй, иргэний бүртгэлийн тасаг, эд хөрөнгийн эрхийн улсын бүртгэлийн тасаг, хуулийн этгээдийн бүртгэлийн бүртгэгч гэсэн бүтэцтэйгээр байгуулагдсан.
2009 оны 6 дугаар сарын 5-нд хуучнаар Иргэний улсын бүртгэл мэдээллийн алба, Үл хөдлөх хөрөнгийн бүртгэлийн алба, Татварын хэлтсийн харьяанд байсан хуулийн этгээдийн бүртгэлийн салбарууд нэгдэж, Улсын бүртгэлийн хэлтэс нэртэйгээр 29 орон тоотой томоохон байгууллага болон өргөжсөн. Хэлтсийн анхны даргаар Ж.Өлзийжаргал томилогдон ажиллаж байлаа.
Анхны жилүүдэд бүртгэлийн гурван салбар бие даан ажилладаг байсныг нэгтгэж, зохион байгуулалтын нэгдсэн удирдлагаар хангах, шинэ хуулийн хэрэгжилтийг хангах, хамт олныг бүрдүүлэх зэрэг томоохон ажлыг богино хугацаанд амжилттай гүйцэтгэсэн.
Тухайн үед ажлын байрны нөхцөл хүнд байсныг албан хаагчид өөрсдийн хүчээр сэргээн засварлаж, хамгийн тохилог ажлын орчныг бий болгосон нь өнөөдрийн бүтээлч хамт олны суурийг тавьсан гэж хэлж болно.
.jpg)
– Та өөрийн ажилласан хугацаанд хамгийн тод ахиц, дэвшлийг юу гэж хардаг вэ?
– Манай хамт олон 2010 онд Монгол Улсын хэмжээнд хэрэгжсэн иргэний шинэчилсэн бүртгэлийн ажлыг амжилттай хэрэгжүүлсэн. Энэ бол бүртгэлийн түүхэнд шинэ үеийг нээсэн томоохон ажил байсан. Насанд хүрсэн иргэн бүрийн биеийн давхцахгүй өгөгдөл буюу хурууны хээг авч бүртгэсэн нь бүртгэлийн үнэн зөв байдлыг сайжруулж, олон жилийн алдаа зөрчлийг засах боломж олгосон.
Тухайн үед аймгийн хэмжээнд иргэний баримт бичгийн зөрчил их байсан. Манай хамт олон илүү цагаар ажиллаж, зөрчилтэй иргэдийн баримтыг нэг бүрчлэн шалган, бүх зөрчлийг 100 хувь арилгаж чадсан нь бахархалтай. Энэ ажлын үр дүнд Улсын хэмжээнд 5-р байрт шалгарч байлаа.
2012 онд бүх иргэдийн иргэний үнэмлэхийг цахим үнэмлэхээр солих ажил, сонгуулийн нэрийн жагсаалт гаргах, 2013 онд малчин өрхүүдийг бүртгэж гэрчилгээжүүлэх, 2014 оноос хуулийн этгээдийн бүртгэлийг цахимжуулах зэрэг шинэчлэлийн ажлуудыг хийж гүйцэтгэсэн.
Эдгээр ажлууд өнөөгийн E-Mongolia системийн үндэс болсон гэж хэлж болно.
– Сүүлийн жилүүдэд танай байгууллагаас хэрэгжүүлсэн онцлох ажлуудаас хуваалцана уу.
– Бид иргэдийг заавал байгууллагад ирүүлэлгүй, “иргэн төвтэй үйлчилгээ”-г хэрэгжүүлж эхэлсэн. Өндөр настан, хөгжлийн бэрхшээлтэй иргэд, отроор явж буй малчид, шүүхийн шийдвэрээр эрх нь хязгаарлагдсан иргэдэд хөдөлгөөнт төхөөрөмжөөр газар дээр нь үйлчилгээ үзүүлж байна.
Мөн “20 минутын Дундговь” зорилтын хүрээнд иргэдэд бүртгэлийн үйлчилгээг богино хугацаанд, чирэгдэлгүй хүргэх чиглэлд анхаарч, зарим үйлчилгээ ердөө 2 минутанд хийгдэж байна.
– Цахим бүртгэлийн давуу талуудын талаар та юу гэж боддог вэ?
– Цахим бүртгэл бол төр, иргэн хоёрын аль алинд нь цаг хугацаа, зардал хэмнэсэн хамгийн оновчтой шийдэл. Төрийн үйлчилгээний хүнд суртлыг бууруулж, ил тод, хөнгөн шуурхай болгосон. Цаашид төрийн байгууллагуудын мэдээлэл солилцоо, уялдаа холбоог сайжруулснаар бүрэн цахим орчинд бүртгэлийн үйлчилгээг авах боломж бүрдэх нь гарцаагүй.
– Танай аймгийн онцлог, сорилт юу байв?
– Орон нутагт ажиллаж байгаа учраас зарим суманд ажиллах орчин, техник хэрэгслийн нөхцөл хүндрэлтэй байсан үе бий. Гэвч үе үеийн удирдлагуудын дэмжлэгтэйгээр тоног төхөөрөмжийн шинэчлэл, ажиллах орчныг сайжруулж, багийн хамтын ажиллагаагаа улам бэхжүүлж чадсан. Манай хамт олон тогтвортой, багаар ажиллах чадвартай, зорьсондоо хүрдэг чадварлаг хамт олон гэж бахархалтайгаар хэлнэ.
– Цаашдын хөгжлийн зорилго, төлөв юу вэ?
– Цаашид бүртгэлийн бүх төрлийн үйлчилгээг иргэн биечлэн ирэхгүйгээр, тоон гарын үсгээр баталгаажуулан цахим хэлбэрээр авах нөхцөлийг бүрдүүлж, цаасан гэрчилгээнээс татгалзаж, цахим хэлбэрийг бүрэн хэрэгжүүлэх нь зүйтэй гэж үздэг.
Байгууллагын хувьд ажилчдаа цахим ур чадварт сургах, эрх зүйн мэдлэгийг нэмэгдүүлэх, чадварлаг цомхон бүтэцтэй төрийн байгууллага болох зорилт тавин ажиллаж байна.
– Эцэст нь, Улсын бүртгэлийн байгууллагын хамт олондоо ойн мэндчилгээ дэвшүүлнэ үү.
– Улсын бүртгэлийн байгууллага үүсч хөгжсөний түүхт 85 жилийн ойн баярыг тохиолдуулан үе үеийн ажилтан, албан хаагчид, хамтран ажиллагсаддаа чин сэтгэлийн баярын мэндийг хүргэе. Төрийн үнэн зөв ой санамж, мэдээллийн баазыг бүрдүүлэх үйлсэд үнэтэй хувь нэмэр оруулсан та бүхэндээ ажлын амжилт, аз жаргал, сайн сайхан бүхнийг хүсэн ерөөе.
