Улсын бүртгэлийн байгууллагын 85 жилийн ойн хүрээнд Говьсүмбэр аймгийн Улсын бүртгэлийн хэлтсийг онцолж байна.
Танай аймгийн Улсын бүртгэлийн хэлтэс хэдэн онд байгуулагдсан бэ? Анхны үеийн онцлог?
Монгол Улсын Засгийн газрын 2008 оны 78 дугаар тогтоолоор “Монгол Улсад бүртгэл мэдээллийн нэгдсэн тогтолцоог бий болгох үндэсний хөтөлбөр” батлагдаж, улсын хэмжээнд бүртгэлийн чиг үүргийг нэгтгэн зохион байгуулсан. Уг хөтөлбөрийн хүрээнд Улсын бүртгэлийн ерөнхий газрыг байгуулж, аймаг, нийслэлд Улсын бүртгэлийн хэлтсүүдийг шинээр байгуулах ажлыг эхлүүлсэн.
Манай хэлтэс 2009 оны 06-р сараас үйл ажиллагаагаа эхлүүлж, Иргэний бүртгэл болон Эд хөрөнгийн эрхийн улсын бүртгэл гэсэн 2 тасагтай, 10 хүний орон тоотойгоор аймгийн Засаг даргын Тамгын газрын 1 давхарын 2 өрөөнд үйл ажиллагаагаа эхлүүлж байлаа.
Анхлан ажилласан хамт олон:
- Хэлтсийн дарга – Д.Мөнх-Эрдэнэ
- Хяналтын улсын байцаагч – З.Баяндугар
- Иргэний бүртгэлийн тасгийн дарга – Л.Насанжаргал
- Иргэний улсын бүртгэгч – Б.Удвалцэцэг
- Эд хөрөнгийн тасгийн дарга – Л.Цэлмэг
- Эд хөрөнгийн улсын бүртгэгч – Д.Амарболд
- Нягтлан бодогч – Г.Ганболд
- МТ-ын мэргэжилтэн, бичиг хэргийн ажилтан – Э.Ганбаатар
- Архивч – Г.Ганчимэг
- Үйлчлэгч – Н.Нансалмаа
Өмнө нь бүртгэлийн албууд тусдаа байсан тул хяналт сул, зөрчил их гардаг байсан. Харин гурван бүртгэлийг нэгтгэснээр төрийн үйлчилгээг нэг цэгээс, илүү хүртээмжтэй, эмх цэгцтэй, чанартай хүргэх боломж бий болсон нь томоохон өөрчлөлт байлаа.
Би 2004 онд иргэний бүртгэлийн тасагт анх ажиллах үед хуучин улаан паспортыг шинэ төрлийн иргэний үнэмлэхээр солих үйл явц эхэлж байсан үе. 2009 оноос иргэний биеийн давхцахгүй өгөгдөлд суурилсан мэдээллийн санг бий болгосноор регистрийн давхардал, нас баралтын бүртгэлд ороогүй зэрэг олон жилийн зөрчил бүрэн арилсан. Энэ бол бүртгэлийн салбарын хөгжлийн том алхам.
Сүүлийн жилүүдэд хийсэн онцлох ажил?
Манай хэлтэс 2023 онд аймгийн Цагдаагийн хэлтсийн хуучин байрыг шилжүүлэн авч, өөрийн байртай болсон. Ингэснээр нотариатын өрөөг байгуулж, бүртгэлийн бүх үйлчилгээг нэг дороос үзүүлэх боломж бүрдсэн.
2024 оны 05 дугаар сараас эхлэн 24/7 үйлчилгээг нэвтрүүлж, иргэд долоо хоногийн ямар ч цагт өөрийн мэдээлэл, лавлагааг авах боломжтой болсон. Мөн зөөврийн тоног төхөөрөмжөөр явуулын үйлчилгээ үзүүлж байна.
Цахимжуулалтын үр дүн?
Цахим үйлчилгээний хүртээмж нэмэгдэж, иргэн хаанаас ч өөртөө холбоотой мэдээллийг авах боломжтой болсон. Аймаг, сум бүрт байршуулсан киоск машинаар дамжуулан улсын бүртгэгчийн ажлын ачаалал буурч, үйлчилгээний чанар сайжирсан.
5. Танай аймгийн онцлог, тулгамдаж буй сорилт?
Говьсүмбэр аймаг хүн амын тоо цөөн боловч авто зам, тээврийн томоохон уулзвар байрладаг тул жолооч, тээвэрчдийн урсгал их, үйлчлүүлэгч олон байдаг. Бүтэц орон тоо цөөн, төсөв хязгаарлагдмал хэдий ч бусад аймагтай ижил хэмжээний төрийн үйлчилгээг цаг алдалгүй хүргэхийн төлөө ажиллаж байна. Улсын бүртгэлийн байгууллагын 85 жилийн ойтой холбогдуулан бид олон ажлыг санаачлан хэрэгжүүлж байна. Хэлтсийн гадна зогсоолыг шинээр хийж, гэрэлтүүлэг, хаягжилтыг сайжруулсан. Цаашид архивын өрөөг өргөтгөх зорилго тавин ажиллаж байна. Учир нь эх нотлох баримтыг хадгалах орчин, нөхцөл чухал.
Улсын бүртгэлийн байгууллагын түүхт 85, нэгдсэн тогтолцоонд шилжсэний 16 жилийн ойн баярын халуун мэндийг үе үеийн дарга, удирдлагууд, ажилтан албан хаагчид, ахмад буурлуудад хүргэе. Та бүхний ажил үйлс өөдөө байж, аз жаргал, эрүүл энх, амжилт бүтээлээр дүүрэн байхыг хүсэн ерөөе.
