Улсын бүртгэлийн ерөнхий газар болон Дотоод хэргийн их сургуулийн хамтран ажиллах санамж бичгийн хүрээнд “Эрх зүй–Улсын бүртгэл” чиглэлээр мэргэшүүлэх, ажилтан бэлтгэх хөтөлбөрийг 2025–2026 оны хичээлийн жилд дөрөв дэх жилдээ амжилттай хэрэгжүүлж байна.
Тус хөтөлбөрийн хүрээнд Дотоод хэргийн их сургуулийн Эрх зүйн ангийн дөрөвдүгээр дамжааны 15 оюутан “Улсын бүртгэл судлал” хичээлийг 512 цагийн хөтөлбөрөөр судалж байгаа бөгөөд Улсын бүртгэлийн ерөнхий газрын холбогдох албан хаагчид сургагч багшийн хувиар зааж байна.
Хөтөлбөрийн зорилго нь улсын бүртгэлийн чиглэлээр онол, практикийг хослуулсан мэдлэгтэй, мэргэшсэн хүний нөөцийг бэлтгэхэд оршиж байгаа юм. Ингэснээр оюутнууд улсын бүртгэлийн байгууллагын үйл ажиллагаа, эрх зүйн орчин, мэдээллийн нэгдсэн системийн талаар гүнзгий мэдлэг олж, цаашид мэргэжлээрээ ажиллах ур чадварыг эзэмших нөхцөл бүрдэж байна.
Улсын бүртгэлийн ерөнхий газар цаашид энэхүү хөтөлбөрийг улам боловсронгуй болгож, хамрах хүрээг өргөжүүлэх, чанар, үр өгөөжийг нэмэгдүүлэх чиглэлээр шат дараатай ажлуудыг хэрэгжүүлэхээр төлөвлөж байна.
