“Хамгийн чухал нь эрүүл мэнд” зорилтот хөтөлбөрийн хүрээнд Хууль зүй, дотоод хэргийн яамны харьяа агентлаг, байгууллагуудын төрийн цэргийн болон хууль сахиулах байгууллагын албан хаагчид, тэдний гэр бүлийн гишүүд эрүүл мэндийн урьдчилан сэргийлэх үзлэгт хамрагдаж байгаа юм.
Уг хөтөлбөр нь Хууль зүй, дотоод хэргийн сайдын санаачилгаар хэрэгжиж байгаа бөгөөд албан хаагчдын эрүүл мэндийг хамгаалах, тэдэнд хүргэх урьдчилан сэргийлэх тусламж үйлчилгээний хүртээмжийг нэмэгдүүлэх, улмаар тэдний амьдралын чанарыг дээшлүүлэхэд чиглэж байна.
Эрүүл мэндийн үзлэгт хамрагдсанаар албан хаагчид эрүүл мэндийн хувийн зөвлөгөө авах, эрсдэлт хүчин зүйлсийг эрт шатанд илрүүлэх, цаашдын эмчилгээ, хяналтыг төлөвлөх зэрэг олон талын чухал мэдээлэл, тусламж үйлчилгээг авч байна.
“Албан хаагч бидний эрүүл мэндийг анхаарч, урьдчилан сэргийлэх үзлэгийг зохион байгуулсан салбарын удирдлагууд болон эмч, эмнэлгийн хамт олонд гүн талархал илэрхийлье” хэмээн үзлэгт хамрагдсан Говьсүмбэр аймгийн улсын бүртгэлийн хэлтсийн албан хаагчид талархлаа илэрхийллээ.
