МУИХ-ын 2024 оны ээлжит сонгуулийн санал хураалт 2024 оны 6 дугаар сарын 28-ны өдөр болох бөгөөд Сонгуулийн хуульд заасны дагуу иргэний шилжилт хөдөлгөөнийг санал авах өдрөөс 60 хоногийн өмнө түр зогсоодог хуулийн зохицуулалттай.
Иймээс Улсын бүртгэлийн байгууллага нь 2024 оны 04 дүгээр сарын 29-ний өдрөөс эхлэн иргэний шилжилт хөдөлгөөний бүртгэлийг түр зогсоох тул иргэд та бүхэн харьяа дүүргийн улсын бүртгэлийн байгууллагын салбар нэгжүүдэд хандан шилжилт хөдөлгөөний бүртгэлээ хийлгэнэ үү.
Улсын бүртгэлийн байгууллага нь иргэн таныг өөрийн оршин суух хаягт бүртгэлтэй нийт иргэдийн мэдээлэлтэй танилцах боломжийг бүрдүүлсэн бөгөөд иргэн та www.check.burtgel.gov.mn холбоосоор нэвтэрч өөрийн хаягт бүртгэлтэй иргэдийн мэдээллийг нягтлан шалгана уу.
Хэрэв таны мэдээлэл зөрүүтэй бол “МЭДЭЭЛЭЛ ЗӨРҮҮТЭЙ БОЛ МЭДЭГДЭХ” товчийг даран холбогдох утасны дугаараа оруулж, санал хүсэлтээ илгээх эсвэл Улсын бүртгэлийн байгууллагын салбар нэгжүүдэд биечлэн хандах боломжтой.
Иргэн та мэдээллээ шалгах явцдаа өөрийн аль нэг мэдээллийг буруу бичсэн тохиолдолд “АЛДАА: ӨГӨГДӨЛ ОЛДСОНГҮЙ” гэсэн бичвэр гарч ирнэ. Ийм тохиолдолд та хувийн мэдээллээ буруу оруулсан байх магадлалтай тул, үнэн зөв оруулсан эсэхээ шалгаж дахин нэвтрэхийг анхааруулъя.
УБЕГ-ын Хамтын ажиллагаа, сургалтын хэлтэс
