Улсын бүртгэлийн ерөнхий газраас аймаг, дүүргийн улсын бүртгэлийн хэлтсийн иргэний улсын бүртгэлийн тасгийн дарга, улсын ахлах бүртгэгч болон холбогдох албан хаагчдын сургалт, хэлэлцүүлгийг 2026 оны 10 дугаар сарын 29, 30-ны өдрүүдэд зохион байгуулж байна.
Тус сургалт, хэлэлцүүлэг нь иргэний улсын бүртгэлийн үйл ажиллагааны үр дүн, тулгамдаж буй асуудал, сайн туршлагыг нэгтгэн дүгнэх, албан хаагчдын хууль, эрх зүйн мэдлэг, программ хангамжийн хэрэглээний чадавхыг дээшлүүлэх, цаашдын хөгжил, шинэчлэлийн чиглэлийг тодорхойлох зорилготой юм.
Сургалтын эхний өдөр Сонгуулийн ерөнхий хорооны Мэдээлэл, судалгаа, сургалтын төвийн референт Ц.Номин сонгуулийн зохион байгуулалт, хууль тогтоомжийн хэрэгжилт, цаашид хэрэгжүүлэх шинэлэг үйл ажиллагаа, чиг хандлагын талаар мэдээлэл өгч, УБЕГ-ын Мэдээллийн технологийн газрын Мэдээллийн сүлжээ, техникийн хэлтсийн дарга Ш.Ариунболд цахимжуулалтын цаашдын чиг хандлагыг танилцууллаа.
Мөн Иргэний улсын бүртгэлийн газрын дарга Н.Наранцэцэг өмнөх жилүүдэд хэрэгжүүлсэн үйл ажиллагааны үр дүн, анхаарах асуудлын талаар мэдээлэл өгч, Төв аймгийн улсын бүртгэлийн хэлтсийн төлөөлөл орон нутагт хэрэгжүүлж буй сайн туршлагаасаа хуваалцав. Үүний зэрэгцээ улсын бүртгэлийн үйл ажиллагаанд хиймэл оюун ухаанд суурилсан технологи нэвтрүүлэх төслийн явц, иргэний улсын бүртгэлийн программ хангамжийн хөгжүүлэлтийг танилцуулж, дадлага ажил зохион байгуулсан юм.
Харин өнөөдөр буюу сургалтын хоёр дахь өдөр УБЕГ-ын дарга Д.Давааням төрийн албан хаагчийн ёс зүй, харилцаа хандлагын талаар сургалт явуулж, Монголын Хуульчдын холбооны гишүүн, хуульч, өмгөөлөгч, сургагч багш А.Батбаатар Гэр бүлийн тухай хуулийн талаар мэдээлэл өглөө. Мөн гэр бүл судлаач Ж.Баясгалан стресс ба менежментийн сэдвээр зөвлөгөө, мэдээлэл хүргэлээ.
Үргэлжлүүлэн Хяналт шалгалтын газрын хяналтын улсын ахлах байцаагч Д.Эрдэнэбат иргэний улсын бүртгэл хөтлөхөд анхаарах асуудал, бүртгэлийн зөрчлийн шалтгаан нөхцөлийн талаар, Улсын бүртгэлийн нэгдсэн архивын газрын ахлах мэргэжилтэн Т.Байгалмаа иргэний улсын бүртгэлийн лавлагаа, мэдээлэл олгоход анхаарах асуудлаар тус тус мэдээлэл өгч байна.
Түүнчлэн Нийслэлийн прокурорын газрын хяналтын прокурор Г.Чагдар гэмт хэрэг, зөрчлийн шалтгаан нөхцөл, урьдчилан сэргийлэх арга хэмжээний талаар, Авлигатай тэмцэх газрын Урьдчилан сэргийлэх, соён гэгээрүүлэх хэлтсийн комиссар Д.Балдандорж авлига, албан тушаалын гэмт хэргийн шалтгаан нөхцөлийн талаар үргэлжлүүлэн мэдээлэл, зөвлөгөөг хүргэнэ.
Сургалтын төгсгөлд оролцогчид иргэний улсын бүртгэлийн үйл ажиллагаанд тулгамдаж буй асуудал, цаашид анхаарах асуудал, мөн хэрэгжүүлэх арга хэмжээний талаар санал солилцож, хэлэлцүүлэг өрнүүлэх юм.
.JPG)
