Б.Зоригтбаатар нь анх 1998 онд Цагдаагийн ерөнхий газрын харьяа Иргэний бүртгэл мэдээллийн улсын төвд цагдаагийн хурандаа Ч.Нэргүйн тушаалаар жолоочоор томилогдож байжээ. Түүнээс хойш УБЕГ-ын Тамгын газрын Санхүү, аж ахуйн хэлтэст харьяалагдан 26 жил тасралтгүй бүртгэлийн байгууллагын төлөө зүтгэж ирсэн түүнд өндөр насны тэтгэвэр тогтоолгон, төрийн албанаас чөлөөлөгдөж буй энэ өдөр буюу 2024 оны 03 дугаар сарын 04-ний өдөр хүндэтгэл үзүүлэн, алдаршуулах арга хэмжээг зохион байгууллаа.
.jpg)
Б.Зоригтбаатар нь хамт олондоо хандаж “Анх энэ байгууллагад иргэний улаан паспортоо өвөртлөн ирээд ажилд орж байлаа. Иргэний үнэмлэх анх нэвтэрч байсан үе мөн гадаад паспорт анх гар ажиллагаатай бичгийн машинаар шивдэг байх үеэс одоогийн цахим болтлоо хөгжсөн энэ түүхэн цаг хугацаанд Улсын бүртгэлийн байгууллагын түүхийг 26 жил бүтээлцэж байснаараа бахархахын сацуу бүртгэлийн байгууллагадаа хувь нэмэр болж явсандаа маш их баяртай байна. Өнөөдөр өндөр настны тэтгэвэрт гарч буй намайг Хүндэт дэвтэрт алдаршуулж бичсэн хамт олондоо талархалаа илэрхийлье” гэв.
.jpg)
Бүртгэлийн байгууллагын хүндэт албан хаагч Б.Зоригтбаатарт болон түүний гэр бүлд эрүүл энх, хамгийн сайн сайхан бүхнийг хүсэн ерөөе.
УЛСЫН БҮРТГЭЛИЙН ЕРӨНХИЙ ГАЗАР
