Улсын бүртгэлийн байгууллагад тасралтгүй 40 жил 6 сар, төрийн албанд 44 жил ажиллаж, улсын бүртгэлийн байгууллагад болон төрийн алба, төрийн цахим шилжилтэд үнэтэй хувь нэмэр оруулсан Хяналт шалгалтын газрын хяналтын улсын байцаагч Банзрагчийн Галбадрахыг байгууллагын “Хүндэт дэвтэр”-т нэрийг нь бичиж, хүндэтгэл үзүүлэх ажиллагааг 2024 оны 03 дугаар сарын 01-ний өдөр зохион байгууллаа.
Б.Галбадрах нь хугацаат цэргийн алба хааж ирээд 1983 оны 07 дугаар сарын 06-ны өдрөөс Шүүх яамны харьяа иргэний гэр бүлийн байдлын бүртгэлийн газарт архивын эрхлэгч, Улсын цагдан сэргийлэх газрын паспортын хэлтсийн байцаагч, ахлах байцаагч, Иргэний бүртгэл мэдээллийн улсын төвд гадаад паспортын бүртгэгч, хяналтын улсын байцаагч, ахлах байцаагч, Улсын бүртгэлийн ерөнхий газрын Хяналт шалгалтын газарт хяналтын улсын ахлах байцаагч, хяналтын улсын байцаагчаар ажиллаж байгаад 2023 оны 12 дугаар сарын 28-ны өдрөөс өндөр насны тэтгэвэр тогтоолгож, төрийн албанаас чөлөөлөгдсөн юм.
Б.Галбадрах хамт олондоо хандаж “Хамтран ажиллаж буй хамт олон, Төрийн албаны салбар зөвлөлийн болон даргын зөвлөлийн гишүүд хүндэтгэл үзүүлж хүлээн авч байгаад туйлын их баяртай, сэтгэл өндөр байна. Би анх Цэргийн тангараг өргөж дараа нь цагдаагийн тангараг, мөн төрийн захиргааны албан хаагчийн тангараг өргөж, төр түмнийхээ төлөө ажиллахаа гурвантаа тангаргалсан хүн. Төрт улс минь түвшин, Түмэн олон амгалан байхын ерөөл өргөе” гэв.
Б.Галбадрах танд болон таны гэр бүлд аз жаргал эрүүл энх, сайн сайхан бүхнийг хүсэн ерөөе.
УЛСЫН БҮРТГЭЛИЙН ЕРӨНХИЙ ГАЗАР
