Аймаг, нийслэл, сум, дүүргийн иргэдийн Төлөөлөгчдийн Хурлын сонгууль энэ оны аравдугаар сарын 15-ны өдөр зохион байгуулагдахаар Улсын Их Хурлаас тогтоол баталсан. Орон нутгийн Хурлын ээлжит сонгуулийн тухай хуулийг хэрэгжүүлэхэд Улсын бүртгэлийн байгууллага 70 гаруй ажил зохион байгуулах ба санал авах өдөр бүх хэсгийн хороодод улсын бүртгэлийн байгууллагаас томилогдсон итгэмжлэгдсэн ажилтан ажиллана. Үүнтэй холбогдуулан итгэмжлэгдсэн ажилтныг эрх зүйн мэдээллээр хэрхэн хангах, түүний чиг үүрэг, гүйцэтгэх ажил зэрэг сэдвүүдээр чиглэл өгөх цахим сургалтыг өнөөдөр /2020.09.04/ нэгжийн дарга нарт зориулан зохион байгууллаа.
УБЕГ-ын дарга Д.Дэлгэрсайхан сургалтыг нээж хэлсэн үгэндээ, ИТХ-ын сонгуулийн бэлтгэл ажил төлөвлөгөөний дагуу явагдаж буйг дурдаад УИХ-ын ээлжит сонгуулийн үед хийгдсэн үйл ажиллагааны хэрэгжилтэд байгууллагын дотоод аудитын газраас дүгнэлт гарсантай холбогдуулан зөвлөмжийн хэрэгжилтэд анхаарч ажиллахыг санууллаа.
Сургалтад орон нутаг дахь Улсын бүртгэлийн газар, хэлтсийн дарга, иргэний улсын ахлах бүртгэгч нар хамрагдсан бөгөөд “Аймаг, нийслэл, сум, дүүргийн иргэдийн төлөөлөгчдийн хурлын сонгуулийн тухай хууль” сэдвийн хүрээнд УБЕГ-ын Иргэний улсын бүртгэлийн газрын дарга Т.Нармандах сургалтыг эхлүүлсэн бол үргэлжлүүлэн “Сонгогчийн нэрийн жагсаалт үйлдэх, сонгогч шилжих журам”, “Итгэмжлэгдсэн ажилтны чиг үүрэг, гүйцэтгэх ажил” сэдвээр ИУБГ-ын улсын ахлах бүртгэгч Н.Наранцэцэг, “Төрийн нууцын хадгалалт, хамгаалалт, мэдээллийн сангийн аюулгүй байдлыг хангах” сэдвээр ТЕГ-ын ажилтан Б.Бат-Энх, “Итгэмжлэгдсэн ажилтантай гэрээ байгуулах” болон “Төрийн албан хаагчийн ёс зүйн асуудал”-аар Захиргаа, эрх зүйн хэлтсийн ахлах мэргэжилтэн Х.Ундрах, Т.Наранцэцэг нар тус тус мэдээлэл хүргэлээ.
УБЕГ-ын Хамтын ажиллагаа, сургалтын хэлтэс
