УЛСАД 33 ЖИЛ ХӨДӨЛМӨРЛӨЖ ГАВЬЯАНЫ АМРАЛТАД ГАРЧ БУЙ БЗД-ИЙН ЭД ХӨРӨНГИЙН ЭРХИЙН УЛСЫН БҮРТГЭЛИЙН АРХИВЧ Б.ЭРДЭНЭТУЯАД ХҮНДЭТГЭЛ ҮЗҮҮЛЛЭЭ

  1. 2026-08-28
  2. Цаг үе, үйл явдал, Мэдээ,
  3. 116 уншсан
A- A A+
УЛСАД 33 ЖИЛ ХӨДӨЛМӨРЛӨЖ ГАВЬЯАНЫ АМРАЛТАД ГАРЧ БУЙ БЗД-ИЙН ЭД ХӨРӨНГИЙН ЭРХИЙН УЛСЫН БҮРТГЭЛИЙН АРХИВЧ Б.ЭРДЭНЭТУЯАД ХҮНДЭТГЭЛ ҮЗҮҮЛЛЭЭ

    Баянзүрх дүүргийн Эд хөрөнгийн эрхийн улсын бүртгэлийн архивч Бадарч овогтой Эрдэнэтуяа нь улсад 33 жил, төрийн байгууллагад 22 жил, үүнээс архивын салбарт 13 жил үр бүтээлтэй, сэтгэл зүтгэл гарган ажиллаж, гавьяаны амралтад гарч байна. 

    Сувилагч мэргэжилтэй тэрээр хөдөлмөрийн гараагаа П.Н.Шастины нэрэмжит Улсын гуравдугаар төв эмнэлгээс эхлүүлж, тус эмнэлэгт 9 жил ажилласан байна. Улмаар эрх зүйч мэргэжлээр дахин суралцаж, 2013 оны 9 дүгээр сард Нийслэлийн Улсын бүртгэлийн газарт ажилд орсноор  улсын бүртгэлийн байгууллагатай ажил амьдралаа холбож, өнөөдрийг хүртэл 13 жилийн турш архивын салбарт хөдөлмөрлөжээ. 
    Тэрээр 2014-2016 онд Баянгол дүүргийн Эд хөрөнгийн эрхийн улсын бүртгэлийн архивч, 2016-2018 онд Нийслэлийн Улсын бүртгэлийн газрын Иргэний улсын бүртгэлийн архивч, 2018 оноос 2026 он хүртэл Баянзүрх дүүргийн Эд хөрөнгийн эрхийн улсын бүртгэлийн архивчаар тус тус ажилласан байна.

    Улсын бүртгэлийн архив нь иргэн, эд хөрөнгийн эрхийн бүртгэлтэй холбоотой эх нотлох баримтыг бүрдүүлэн хадгалж, хамгаалан, төрийн мэдээллийн үнэн зөв, тасралтгүй байдлыг хангах чухал үүрэгтэй.  Энэ хариуцлагатай ажлыг олон жил нэр төртэй гүйцэтгэсэн архивч Б.Эрдэнэтуяаг УБЕГ-ын дарга Д.Давааням, Тамгын газрын дарга Л.Нямдаваа, Улсын бүртгэлийн нэгдсэн архивын газрын дарга С.Оюунгэрэл нар хүлээн авч уулзан, хүндэтгэл үзүүллээ.

    Энэ үеэр УБЕГ-ын дарга Д.Давааням: “Архивын баримт бол улсын бүртгэлийн байгууллагын түүх, ой санамж төдийгүй иргэн, эд хөрөнгийн эрхийн бүртгэлийн үнэн зөвийг нотлох чухал эх сурвалж юм. Ийм үнэ цэнтэй баримтыг нягт нямбай хадгалж, хамгаалах ажил нь өндөр хариуцлага, тэвчээр, мэргэжлийн ур чадвар шаарддаг. Та энэ хариуцлагатай ажлыг олон жил сэтгэл зүрх, мэдлэг туршлагаа зориулан хийж, архивын салбарын хөгжилд үнэтэй хувь нэмэр оруулж, хариуцлагатай ажлыг нэр төртэй гүйцэтгэж ирсэнд тань талархаж байна. Цаашдын амьдралын тань шинэ сайхан үе эхэлж байна. Гавьяаны амралтаа үр хүүхэд, гэр бүл, хайртай дотны хүмүүстэйгээ эрүүл энх, аз жаргалтай өнгөрүүлж, хийж бүтээсэн бүхнээрээ бахархаж яваарай” хэмээн баяр хүргэж, сайн сайхныг хүсэн ерөөлөө.


БЗД-ийн Улсын бүртгэлийн хэлтсийн Эд хөрөнгийн эрхийн улсын бүртгэлийн архивч Б.Эрдэнэтуяа нь ажиллах хугацаандаа 2020 онд “Улсын бүртгэлийн тэргүүний ажилтан”, 2024 онд “Хөдөлмөрийн хүндэт медаль”, 2026 онд “Хууль зүйн албаны тэргүүний ажилтан” цол тэмдгээр тус тус шагнагджээ.

 

   

 Баянзүрх дүүргийн Эд хөрөнгийн эрхийн улсын бүртгэлийн архивч Б.Эрдэнэтуяа:  “Би төрийн байгууллагад 22 жил, үүнээс архивын салбарт 13 жил ажиллаж байна. Олон жил ажиллахад хамт олон гэдэг хамгийн чухал зүйл байдаг. Байнга тусалж, дэмжиж байсан хамт олондоо маш их баярлаж, та нараараа бахархаж, хүндэтгэж явдаг гэдгээ энэ ташрамд хэлмээр байна. Архивчийн ажил хүнд, хариуцлагатай, тэвчээр шаардсан ажил. Би энэ ажилдаа дуртай, хайртай. Ийм сайхан байгууллагадаа ажиллаж байснаараа үргэлж бахархаж явах болно. Хамт олон минь үргэлж өөдлөн дэвжиж, та бүхний ажил үйлс дандаа бүтэж, эрүүл энх, аз жаргалтай, сайн сайхан байхыг хүсье” хэмээн сэтгэгдлээ хуваалцлаа.

 
    Архивын салбарт ажилласан он жилүүдээрээ байгууллагынхаа түүхийг бүтээлцэж, хамт олондоо мэдлэг, туршлагаа харамгүй хуваалцаж, улсын бүртгэлийн байгууллагын нэгэн үеийн төлөөлөл болон ажиллаж гавьяаны амралтад гарч байгаа  Б.Эрдэнэтуяа таны цаашдын амьдралд нь эрүүл энх, аз жаргал, сайн сайхан бүхнийг хүсэн ерөөе.

                                                                                                                 

                                                                               УЛСЫН БҮРТГЭЛИЙН ЕРӨНХИЙ ГАЗАР