Улсын бүртгэлийн байгууллагаас иргэдэд төрийн үйлчилгээг шуурхай, хүртээмжтэй, чирэгдэлгүй хүргэх зорилгоор эд хөрөнгийн эрхийн бүртгэлийн үйлчилгээг цахим хэлбэрт шилжүүлэх ажлыг үе шаттайгаар хэрэгжүүлж, 2026 оны 07 дугаар сарын 06-ны өдрөөс Баянзүрх дүүргийн Улсын бүртгэлийн хэлтэст эд хөрөнгийн эрхийн улсын бүртгэлийн шинэчилсэн цахим системийн туршилтын ажлыг эхлүүлсэн. Энэ хүрээнд өнөөдөр Баянзүрх дүүргийн Улсын бүртгэлийн хэлтэст Улсын бүртгэлийн ерөнхий газрын дарга Д.Давааням, холбогдох албан тушаалтнууд болон программ хангамж хөгжүүлэгч “Astvision” байгууллагын төлөөлөл оролцож, Эд хөрөнгийн эрхийн бүртгэлийн цахим системийн туршилтын ажлын явц, үр дүнтэй танилцлаа.
(1).jpg)
.jpg)
Мөн Улсын бүртгэлийн ерөнхий газраас хөгжүүлж буй барьцаалбарыг цахимаар бүртгэх, чөлөөлөх цахим системийг 2026 оны есдүгээр сараас хэрэглээнд нэвтрүүлэх бэлтгэл ажлын явцтай танилцаж, системийг үйлчилгээнд нэвтрүүлэхэд анхаарах асуудал, цаашид хэрэгжүүлэх арга хэмжээний талаар санал солилцов.
Эд хөрөнгийн эрхийн бүртгэлийн үйлчилгээг цахим хэлбэрт шилжүүлснээр:
- Цаасан баримт бичигт суурилсан бүртгэлээс цахим бүртгэлд үе шаттайгаар шилжинэ.
- Төрийн байгууллагууд нэгдсэн мэдээллийн сүлжээгээр мэдээлэл солилцож, төрд байгаа мэдээллийг иргэнээс дахин шаардах шаардлага буурна.
- Иргэдийн цаг хугацаа, зардлыг хэмнэж, төрийн үйлчилгээг авахад үүсдэг чирэгдлийг бууруулна.
- Барьцаалбар бүртгүүлэх, чөлөөлөхтэй холбоотой иргэдийн зорчих хөдөлгөөн, бичиг баримтын ачааллыг багасгана.
- Төрийн үйлчилгээг илүү шуурхай, хүртээмжтэй, ил тод хүргэх боломж бүрдэнэ.
.jpg)
Эд хөрөнгийн эрхийн бүртгэлийн үйлчилгээг цахимжуулснаар иргэн, хуулийн этгээдэд үзүүлэх төрийн үйлчилгээний хүртээмжийг нэмэгдүүлж, бүртгэлийн үйл ажиллагааг илүү хялбар, шуурхай, чирэгдэлгүй болгох нөхцөл бүрдэх юм.
