Монгол Улсад уур амьсгалын өөрчлөлт, цөлжилт, ган, зудын давтамж нэмэгдэхийн хэрээр хөдөө орон нутгийн иргэдийн амьжиргаанд сөргөөр нөлөөлж, улмаар хөдөө орон нутгаас Улаанбаатар хот болон бусад аймаг, суурин газар руу чиглэсэн шилжилт хөдөлгөөнд илүүтэйгээр нөлөөлж байна.
Ялангуяа мал аж ахуйгаас хамааралтай иргэдийн хувьд ган, зуд, бэлчээрийн доройтол зэрэг байгаль, цаг уурын эрсдэл нь амьжиргааны эх үүсвэрт хүндрэл учруулах нэг хүчин зүйл болж байна. Үүний зэрэгцээ иргэд ажил хөдөлмөр эрхлэх, сургууль, дамжаанд суралцах, боловсрол, эрүүл мэнд, халамжийн үйлчилгээ авах, эмчлүүлэх зэрэг нийгэм, эдийн засгийн шалтгаанаар Улаанбаатар хотод шилжин суурьшиж байна.
Харин төвийн бүс болох Дархан-Уул, Сэлэнгэ, Төв аймагт газар тариалан эрхлэх шалтгаанаар бусад орон нутгаас шилжин суурьших хандлага ажиглагджээ.
Улаанбаатар хот руу чиглэсэн шилжилт хөдөлгөөнийг харвал:
Улаанбаатар хотод шилжин суурьшихаар бүртгүүлсэн иргэдийн 2021-2025 оны тоон мэдээллийг авч үзвэл, 2022 онд хамгийн өндөр буюу 42,800 иргэн бүртгүүлсэн байна.
- 2021 он – 25,758 иргэн
- 2022 он – 42,800 иргэн
- 2023 он – 32,298 иргэн
- 2024 он – 31,162 иргэн
- 2025 он – 32,067 иргэн
2022 онд шилжин суурьших иргэдийн тоо огцом өссөн бол 2023-2025 онд 31-32 мянга орчимд хэлбэлзэж, харьцангуй тогтвортой түвшинд хадгалагдсан байна.
Харин бүс нутгаар харвал:
2021-2025 онд орон нутгаас Улаанбаатар хот болон бусад аймаг руу шилжин явсан иргэдийг бүс нутгаар авч үзвэл Төвийн бүсээс хамгийн олон буюу 51,825 иргэн шилжин явсан байна. Үүний дараа Баруун бүсээс 43,129, Хангайн бүсээс 39,459, Хойд бүсээс 38,492, Говийн бүсээс 30,121, Зүүн бүсээс 25,042 иргэн тус тус шилжин явжээ. Ингэснээр дээрх зургаан бүсээс 2021-2025 онд нийт 228,068 иргэн Улаанбаатар хот болон бусад аймаг, орон нутаг руу шилжин явсан байна.
.png)
Дээрх тоон мэдээллээс харахад Монгол Улсын дотоодын шилжилт хөдөлгөөнд уур амьсгалын өөрчлөлт, цөлжилт, ган, зуд зэрэг байгаль, цаг уурын хүчин зүйлээс гадна ажил эрхлэлт, боловсрол, эрүүл мэнд, нийгмийн үйлчилгээний хүртээмж зэрэг олон хүчин зүйл нөлөөлж байна.
Иймд хөдөө орон нутагт иргэдийн тогтвортой амьжиргааг дэмжих, уур амьсгалын өөрчлөлтөд дасан зохицох боломжийг нэмэгдүүлэхийн зэрэгцээ боловсрол, эрүүл мэнд, хөдөлмөр эрхлэлт, нийгмийн үйлчилгээний хүртээмжийг сайжруулах нь шилжилт хөдөлгөөний төвлөрлийг бууруулахад чухал ач холбогдолтой юм.
