ДОРНОГОВЬ АЙМГИЙН УЛСЫН БҮРТГЭЛИЙН ХЭЛТЭС "ИРГЭНДЭЭ ЭЭЛТЭЙ БҮРТГЭЛИЙН ҮЙЛЧИЛГЭЭ"-НИЙ ОРЧНЫГ САЙЖРУУЛЛАА

Дорноговь аймгийн Улсын бүртгэлийн хэлтэс нь иргэд, олон нийтэд төрийн үйлчилгээг хүртээмжтэй, шуурхай, хүндрэлгүй хүргэх, иргэн төвтэй үйлчилгээний орчныг бүрдүүлэх зорилгоор үйлчилгээний заалны зохион байгуулалтыг шинэчилж, тодорхой арга хэмжээнүүдийг хэрэгжүүлж байна.

Энэ хүрээнд бүртгэгчийн ширээн дээрх шилэн тусгаарлах хаалтыг авч, иргэн, бүртгэгч хоорондын шууд, нээлттэй, саадгүй харилцааг бий болголоо. Ингэснээр үйлчилгээний явцад албан хаагчийн тайлбар, мэдээллийг иргэд тодорхой, ойлгомжтой сонсох боломж нэмэгдэж, харилцан ойлголцлыг сайжруулахын зэрэгцээ давтан асуух, тайлбарлах зэрэг хүндрэл буурах нөхцөл бүрдэж байна.

Мөн сургууль, цэцэрлэгийн шинэ хичээлийн жил эхлэхтэй холбоотойгоор иргэдийн хандалт, үйлчилгээний ачаалал нэмэгдэх үед иргэдэд тав тухтай орчин бүрдүүлэх зорилгоор үйлчилгээний зааланд өргөдөл, хүсэлт бичих зориулалтын ширээ болон хүлээлгийн нэмэлт сандлыг байршууллаа. 

Түүнчлэн үйлчилгээний заалны агаарын нөхцөлийг сайжруулах зорилгоор нэмэлтээр агааржуулалтын системийг суурилуулах угсралт, холболтын ажлыг гүйцэтгэж байна.

Эдгээр зохион байгуулалтын ажил нь иргэдэд төрийн үйлчилгээг таатай, хүртээмжтэй, саадгүй орчинд авах нөхцөлийг бүрдүүлж, үйлчилгээний чанар, хүртээмжийг сайжруулахад чухал ач холбогдолтой юм.  

Тус хэлтэс нь “Иргэндээ ээлтэй бүртгэлийн үйлчилгээ” аяны хүрээнд иргэдийн санал, хэрэгцээ шаардлагад тулгуурлан үйлчилгээний орчин, зохион байгуулалтыг цаашид үе шаттайгаар сайжруулж, иргэнд ойр, шуурхай, чирэгдэлгүй, ойлгомжтой төрийн үйлчилгээг хүргэх зорилтыг хэрэгжүүлэн ажиллаж байна.