Монгол Улсын Үндэсний их баяр наадмыг тохиолдуулан Улсын бүртгэлийн байгууллагын эрхэм зорилго, үнэт зүйлсийг эрхэмлэн, ажил үүргээ үр бүтээлтэй, идэвх санаачилгатай, хариуцлагатай гүйцэтгэн, салбарын хөгжилд бодит хувь нэмэр оруулсан албан хаагчдын хөдөлмөр, бүтээл, амжилтыг үнэлэн алдаршуулах “Улсын бүртгэлийн байгууллагын албан хаагчдад шагнал гардуулах ёслолын үйл ажиллагаа”-г өнөөдөр (2026.07.09) зохион байгууллаа.
Тулгар төрийн 2235 жил, Их Монгол Улсын 820 жил, Үндэсний эрх чөлөө, тусгаар тогтнолоо сэргээн мандуулсны 115 жил, Ардын хувьсгалын 105 жил, Ардчилсан хувьсгалын 36 жилийн ой, Үндэсний их баяр наадмын босгон дээр Улсын бүртгэлийн байгууллагын нийт 160 албан хаагч төрийн дээд одон, салбарын болон байгууллагын шагналаар тус тус шагнагдаж байна.
Тухайлбал,
- Төрийн дээд “Алтан гадас” одон– 2 албан хаагч
- Хууль зүй, дотоод хэргийн салбарын “Тэргүүний ажилтан” тэмдэг – 27 албан хаагч
- Улсын бүртгэлийн байгууллагын “Тэргүүний ажилтан” тэмдэг – 27 албан хаагч
- Хууль зүй, дотоод хэргийн яамны “Хүндэт жуух бичиг” – 62 албан хаагч
- Улсын бүртгэлийн ерөнхий газрын “Жуух бичиг” – 45 албан хаагчийг тус тус шагнаж, урамшууллаа.
Шагнал гардуулах ёслолын үйл ажиллагааны төгсгөлд УБЕГ-ын Тамгын газрын дарга Л.Нямдаваа шагнал авсан нийт албан хаагчдад чин сэтгэлийн баяр хүргэж, цаашдын ажил хөдөлмөрт нь өндөр амжилт, эрүүл энх, сайн сайхан бүхнийг хүсэж “Шагнал гэдэг бол зүгээр нэг гоёл, чимэглэл биш. Харин өөрт оногдсон ажил үүрэгтээ эзэн болж, төрийн албан хаагчийн нэр төрийг өндөрт өргөн, үүрэг хариуцлагаа ухамсарлан нэр төртэйгээр биелүүлж, мэргэшсэн ур чадвар, хөдөлмөр зүтгэл, гаргасан бодит үр дүн, ололт амжилтыг тань үнэлсэн хүндэтгэл юм. Цаашид ч Та бүхэн төрийн албаны үнэт зүйл болох хууль дээдлэх ёс, шударга байдал, хариуцлага, ёс зүй, иргэн төвтэй үйлчилгээг эрхэмлэн ажиллаж, байгууллагынхаа хөгжил дэвшилд бодит хувь нэмэр оруулан, иргэдийн итгэлийг хүлээсэн, нэр хүндтэй төрийн албан хаагч байна гэдэгт итгэж байна. Өргөсөн тангарагтаа үнэнч байж, төрийн албаны нэр хүндийг эрхэмлэн ажиллахыг хүсье” хэмээн онцоллоо.
