Улсын бүртгэлийн ерөнхий газар, Азийн хөгжлийн банкны дэмжлэгтэй хэрэгжүүлж буй "ТА10201-МОН: Сумдад эд хөрөнгийн эрхийн болон хуулийн этгээдийн улсын бүртгэлийн үйлчилгээг цахимжуулах, нэвтрүүлэх замаар төрийн үйлчилгээг бэхжүүлэх, төвлөрлийг сааруулах" техникийн туслалцааны төслийн хүрээнд эд хөрөнгийн эрхийн улсын бүртгэлийн систем болон хуулийн этгээдийн улсын бүртгэлийн системийг шинэчлэх ажил үе шаттайгаар хэрэгжиж байна.
Төслийн хүрээнд эд хөрөнгийн эрхийн улсын бүртгэл хөтлөх шинэ системийг хөгжүүлэх, үйл ажиллагааны шаардлагад нийцүүлэн сайжруулах, хэрэглээнд нэвтрүүлэх ажлыг бүртгэлийн байгууллагын Ажлын хэсэг болон гүйцэтгэгч байгууллагатай хамтран зохион байгуулсан.
Шинэ системийг нэвтрүүлснээр төрийн байгууллагуудын мэдээллийн сангийн уялдаа холбоог сайжруулах, улсын бүртгэлийн үйлчилгээг иргэн, хуулийн этгээдэд илүү хурдан, хүртээмжтэй, ил тод хүргэх, бүртгэлийн үйл ажиллагааны үр ашиг, мэдээллийн аюулгүй байдал, системийн тогтвортой ажиллагааг хангах ач холбогдолтой юм.
Туршилтын хугацаанд эд хөрөнгийн эрхийн улсын бүртгэлийн мэдүүлгийг хүлээн авах, шийдвэрлэх, бүртгэх, лавлагаа, гэрчилгээ олгох, бүртгэлийн мэдээллийг боловсруулах зэрэг үндсэн үйл ажиллагааг бодит ажлын орчинд туршиж, системийн ажиллагаа, өгөгдлийн үнэн зөв байдал, хурд, найдвартай ажиллагаа, бусад төрийн байгууллагын мэдээллийн сантай мэдээлэл солилцох боломж болон хэрэглэгчийн ажиллагааг бодит орчинд газар дээр нь шалгаж, илэрсэн санал, зөвлөмжийг үндэслэн шаардлагатай сайжруулалтыг хийж, тус системийг бүрэн нэвтрүүлэх бэлтгэлийг хангах юм.
