Улсын бүртгэлийн байгууллагад шинээр томилогдсон албан хаагчдыг чиглүүлэх, төрийн албаны үнэт зүйл, байгууллагын соёл, мэргэжлийн ёс зүйг төлөвшүүлэх, албан үүргээ үр дүнтэй хэрэгжүүлэхэд шаардлагатай онолын мэдлэг, практик ур чадвар эзэмшүүлэх зорилготой сургалтыг 2026 оны 6 дугаар сарын 22-30-ны өдрүүдэд зохион байгууллаа.
Сургалтын эхний өдөр байгууллагын түүхэн хөгжил, бүтэц, чиг үүрэг, баримт бичгийн стандартын дагуу албан хэрэг хөтлөлт, байгууллагын үйлчилгээний стандарт, төрийн албан хаагчийн эрх зүйн байдал, ёс зүй, харилцаа, төрийн албаны нийтлэг эрх, үүрэг, хөдөлмөрийн дотоод журам, хүний нөөцийн бодлого, байгууллагын дотоод үйл ажиллагааны талаар мэдээлэл өгч, байгууллагын цахим мэдээллийн аюулгүй байдал, кибер аюулгүй байдал, албан хаагчийн аюулгүй ажиллагаа, архив, албан хэрэг хөтлөлтийн чиглэлээр мэргэжлийн сургалт зохион байгууллаа. Хоёр дахь өдөр иргэний улсын бүртгэл, хуулийн этгээдийн улсын бүртгэл, эд хөрөнгийн эрхийн улсын бүртгэлийн үйл ажиллагаа, улсын бүртгэлийн хяналтын чиг үүрэг, бүртгэлийн үйл ажиллагаанд мөрдөх хууль тогтоомж, анхаарах асуудлуудын талаар ахлах мэргэжилтнүүд сургалт орж, цаашдын дадлагын ажлын зохион байгуулалттай танилцуулсан юм.
.jpg)
2026 оны 6 дугаар сарын 24-26-ны өдрүүдэд оролцогчдыг хуваарилагдсан дүүргийн Улсын бүртгэлийн хэлтэст дадлага хийлгэж, иргэн, хуулийн этгээд болон эд хөрөнгийн эрхийн улсын бүртгэлийн үйлчилгээний бодит үйл ажиллагаатай танилцуулан, онолын мэдлэгээ практикт хэрэгжүүлэх боломжийг бүрдүүлсөн бөгөөд 29-ний өдөр мэдлэг бататгах сургалтыг зохион байгуулж, дадлагын хугацаанд тулгарсан асуудал, туршлагаа хэлэлцэн, бүртгэлийн үндсэн чиглэлүүдээр мэргэжил арга зүйн зөвлөгөө, зөвлөмж өгч, сургалтын агуулгыг нэгтгэн бататгалаа. Сургалтын сүүлийн өдөр буюу өнөөдөр (2026.06.30) тус сургалтад хамрагдсан албан хаагчид онолын болон ярилцлагын шалгалтад хамрагдаж, амжилттай төгссөнийг баталгаажуулан сертификат гардууллаа. Шинээр томилогдсон албан хаагчдад зориулсан энэхүү сургалт нь байгууллагын үйл ажиллагааны онцлог, улсын бүртгэлийн хууль тогтоомж, төрийн албаны зарчим, ёс зүйн хэм хэмжээг төлөвшүүлэхийн зэрэгцээ иргэдэд төрийн үйлчилгээг хуульд нийцүүлэн, түргэн шуурхай, чанартай хүргэхэд шаардлагатай мэдлэг, ур чадварыг эзэмшүүлэхэд ач холбогдолтой арга хэмжээ боллоо.
