“ЕВРОАЗИЙН ИРГЭНИЙ БҮРТГЭГЧДИЙН НИЙГЭМЛЭГ”-ийн уулзалт, зөвлөгөөн болж байна

  1. 2026-06-04
  2. Цаг үе, үйл явдал, Мэдээ,
  3. 93 уншсан
A- A A+
“ЕВРОАЗИЙН ИРГЭНИЙ БҮРТГЭГЧДИЙН НИЙГЭМЛЭГ”-ийн уулзалт, зөвлөгөөн болж байна

“Евроазийн иргэний бүртгэгчдийн нийгэмлэгийн уулзалт”-ыг Нэгдсэн Үндэстний Байгууллагын Ази, Номхон далайн бүс нутгийн Эдийн засаг, нийгмийн комисс (ESCAP) болон Нэгдсэн Үндэстний Байгууллагын Хүн амын сан (UNFPA) хамтран Монгол Улсад 2026 оны 06 дугаар сарын 02-04-ний өдрийн хооронд Үндэсний статистикийн хороо болон Улсын бүртгэлийн ерөнхий газартай хамтран зохион байгуулж байна.

Уулзалтад Нэгдсэн Үндэстний Байгууллагын Хүн амын сан (UNFPA), НҮБ-ын Ази, Номхон далайн  бүс нутгийн Эдийн засаг, нийгмийн комисс (ESCAP)-ын төлөөллүүд болон Евроазийн бүс нутгийн иргэний бүртгэл, хүн амын төлөв байдлын статистикийн (CRVS) чиглэлээр ажилладаг байгууллагуудын төлөөлөгчид оролцож байна. Мөн Оросын Холбооны Улс, Бүгд Найрамдах Киргиз Улс,  Армени, Туркменистан, Гүрж, Казакстан, Турк, Узбекистан, Азербайжан зэрэг улсын төлөөлөгчид оролцож өөрсдийн улсын сайн туршлага, тулгамдаж буй асуудал, хэрэгжүүлж буй шинэчлэлийн талаар тус бүр илтгэл танилцуулж, харилцан санал солилцох юм.

Түүнчлэн уулзалтад оролцогчид Улсын Нэгдүгээр төв эмнэлэг, Өргөө амаржих газар, Улсын бүртгэлийн ерөнхий газар, Сүхбаатар дүүргийн Улсын бүртгэлийн хэлтсийн үйл ажиллагаатай танилцаж, төрөлт, нас баралтын бүртгэл, иргэний улсын бүртгэлийн үйлчилгээ, цахим үйлчилгээний төвийн үйл ажиллагааг газар дээр нь үзэж танилцахаар төлөвлөсөн бөгөөд тус төлөвлөгөөний дагуу 2026 оны 06 дугаар сарын 03-ны өдөр Улсын бүртгэлийн ерөнхий газарт ажиллаж, бүртгэлийн байгууллагын үйл ажиллагаатай танилцлаа. УБЕГ-ын дарга Д.Давааням, Тамгын газрын дарга Л.Нямдаваа, Иргэний улсын бүртгэлийн газрын дарга Н.Наранцэцэг болон бусад газар, хэлтсийн дарга нар “Евроазийн иргэний бүртгэгчдийн нийгэмлэг”-ийн зочид, төлөөлөгчдийг хүндэтгэн хүлээн авч, улсын бүртгэлийн байгууллагын үйл ажиллагааны талаар танилцуулга мэдээллийг хүргэж, архивын баримт цахимжуулалт, зөөврийн тоног төхөөрөмж, 24/7 цахим үйлчилгээний төвийг танилцуулав.

УБЕГ-ын дарга Д.Давааням хэлэхдээ: “Сүүлийн жилүүдэд манай байгууллага төрийн үйлчилгээг цахимжуулах, мэдээллийн сангийн уялдаа холбоог сайжруулах, бүртгэлийн үйл ажиллагааны аюулгүй байдал, найдвартай байдлыг бэхжүүлэх чиглэлээр томоохон шинэчлэлүүдийг үе шаттай хэрэгжүүлж байна. Энэхүү үйл ажиллагаа нь иргэдэд үзүүлэх үйлчилгээний чанарыг сайжруулахын зэрэгцээ төрийн байгууллагууд хоорондын мэдээлэл солилцоог боловсронгуй болгоход чухал ач холбогдолтой юм. Иймд бид Евроазийн иргэний бүртгэгчдийн нийгэмлэгийн хүрээнд өрнөж буй хамтын ажиллагаа, мэдлэг туршлага солилцох үйл ажиллагааг өндөр ач холбогдолтой гэж үздэг бөгөөд цаашид ч идэвхтэй оролцож, хамтын ажиллагааг өргөжүүлэн хөгжүүлэхэд бэлэн байгаагаа илэрхийлье” гэлээ.  

Энэхүү уулзалт нь иргэний бүртгэл, хүн амын төлөв байдлын статистикийн тогтолцоог боловсронгуй болгох, улс орнуудын хамтын ажиллагааг өргөжүүлэх, сайн туршлага солилцох, бүс нутгийн хэмжээнд тулгамдаж буй асуудлуудад хамтарсан шийдэл боловсруулахад чухал ач холбогдолтой бөгөөд тус хөтөлбөрийн хүрээнд оролцогчид өгөгдөл хамгаалалт, мэдээлэл солилцоо, систем хоорондын харилцан уялдаа, бүртгэлийн үйлчилгээний хүртээмж зэрэг асуудлаар хэлэлцүүлэг өрнүүлж, бүс нутгийн хэмжээнд хамтран ажиллах боломж, шийдлүүдийг тодорхойлох юм.

Евроазийн Иргэний бүртгэгчдийн нийгэмлэгийн уулзалт, зөвлөгөөн өнөөдөр (2026.06.04) 3 дахь өдрөө үргэлжилж байна.