Өнгөрсөн 2025 оны 5 дугаар сарын 23-ны өдөр Хууль зүй, дотоод хэргийн сайд Улсын бүртгэлийн эх нотлох баримтын архивын хадгалалт, хамгаалалтыг сайжруулах, мөн албан хаагчдын нийгмийн асуудлыг шийдвэрлэх зорилготой үйл ажиллагааны хөтөлбөрийг баталж энэ хөтөлбөрийн хүрээнд Улсын бүртгэлийн ерөнхий газрын архивын зориулалттай барилга болон албан хаагчдад зориулсан орон сууцны барилгын шав тавих ёслолыг 2025 оны зургаадугаар сарын 5-ны өдөр зохион байгуулж байсан билээ.
Тэгвэл энэхүү төслийн хүрээнд барилгын ажлын явц, хэрэгжилтийн нөхцөл байдалтай УБЕГ-ын удирдах албан тушаалтнууд газар дээр нь танилцлаа. Барилгын ажлын явцтай танилцах үеэр барилгын гүйцэтгэл, инженерийн дэд бүтэц, дотоод болон гадна заслын ажлын явц, энд ажиллаж буй хүн хүчний асуудал, тэдгээрийн хөдөлмөрийн аюулгүй байдал, барилгын чанар стандартын хэрэгжилтийн талаар холбогдох инженер, мэргэжилтнүүд мэдээлэл өгч, цаашдын ажлын төлөвлөгөө болон хэрэгжүүлэх, анхаарах асуудал мөн гарч болзошгүй асуудлуудын талаар хэлэлцэж, мэдээллийг тухай бүр харилцан шуурхай солилцож байхаар тохиролцов.
Өнөөдрийн байдлаар барилгын ажлын гүйцэтгэл дээр 30 гаруй ажилтан ажиллаж байгаа бөгөөд гадна карказын ажил хамгийн сүүлийн давхартаа орсон, дотор сантехникийн шугам хоолойн угсралтын ажил эхэлсэн, өрөөний дотоод хуваалт хийх бэлтгэл ажлууд хангагдсан байдалтай байна.
