Улсын бүртгэлийн ерөнхий газрын Эд хөрөнгийн эрхийн улсын бүртгэлийн үйлчилгээний 55-60 хувийг барьцааны гэрээ бүртгүүлэх, өөрчлөх, дуусгавар болгох үйл ажиллагаа эзэлдэг. Иргэд энэ үйлчилгээг авахын тулд банк, ББСБ, нотариат, улсын бүртгэлийн байгууллага гэсэн байгууллагуудын дунд жилдээ 265-270 мянган удаагийн явдал, чирэгдэл болдог. Энэ хэрээр иргэдийн халааснаас зардал, цаг хугацаа ихээр орж байна. Иймээс энэхүү үйлчилгээг бүрэн цахимжуулж, үл хөдлөх хөрөнгөө барьцаалж буй иргэн банк, ББСБ дээрээ ажлаа амжуулаад буцдаг болгох, улсын бүртгэлийн байгууллагад биечлэн ирэхгүйгээр барьцааны бүртгэлээ хийлгэх боломжийг бүрдүүлэх зорилтыг тавин, УБЕГ-аас ажлын хэсэг байгуулан ажиллаж байна.
Барьцааны эрхтэй холбоотой нийт бүртгэлийн 25%-ийг ББСБ-уудаас үзүүлж буй үйлчилгээ эзэлж байгаа тул өнөөдөр (2026.05.14) Монголын банк бус санхүүгийн байгууллагуудын холбооны төлөөллийг хүлээн авч санал солилцлоо.
Холбооны зүгээс Хуулийн мэргэжлийн зөвлөлийн дарга М.Цогтгэрэл, Үйл ажиллагаа хариуцсан мeнeжeр О.Цэрэндулам нар оролцсон бөгөөд энэхүү барьцааны бүртгэлийн цахимжилтыг бүрэн дэмжиж, хамтран ажиллана гэдгээ илэрхийлэв.
Тус уулзалтад УБЕГ-ын ЭХЭУБГ-ын дарга Д.Болормаа, МТГ-ын дарга С.Чинбат, Кибер аюулгүй байдлын хэлтсийн дарга Б.Золбоо, ажлын хэсгийн гишүүд Э.Отгонтунгалаг, Э.Мөнхжин, Х.Болорчулуун нар оролцлоо.
