Өмнөговь аймгийн улсын бүртгэлийн хэлтэс Даланзадгад сумын 1 болон 10 дугаар багийн иргэд, малчдад төрийн үйлчилгээний хүртээмжийг нэмэгдүүлэх, мэдээллийн ил тод байдлыг хангах зорилгоор мэдээлэл, зөвлөмж хүргэн ажиллалаа.
Энэ хүрээнд улсын бүртгэлийн үйлчилгээний төрөл, иргэд үйлчилгээ авахдаа бүрдүүлэх материал, хугацаа болон холбогдох журам, зохицуулалтын талаар дэлгэрэнгүй танилцуулж, үйлчилгээний ихэнхийг цахим хэлбэрээр авах боломжтой болсныг онцоллоо. Мөн төрийн үйлчилгээний нэгдсэн систем болон холбогдох платформоор дамжуулан иргэд цаг хугацаа, зардлаа хэмнэн, орон зайнаас үл хамааран үйлчилгээ авах нөхцөл бүрдсэн талаар мэдээлэв.
Түүнчлэн иргэний тоон гарын үсгийн ач холбогдол, хэрэглэх заавар, цахим орчин дахь аюулгүй байдлыг хангах, хувийн мэдээллээ хамгаалах, цахим залилан, фишинг халдлагаас сэргийлэх талаарх зөвлөмжийг өгч, бодит жишээнд тулгуурласан тайлбар хийлээ.
Уг арга хэмжээ нь алслагдсан багийн иргэд, малчдад төрийн үйлчилгээг ойртуулах, цахим хэрэглээний мэдлэг, ур чадварыг нэмэгдүүлэхэд чиглэсэн бөгөөд цаашид иргэдэд хүрч ажиллах ажлыг үе шаттайгаар үргэлжлүүлэх болно.
