УБНА-ын дарга С.Оюунгэрэл Монгол Улсын "Үйлчилгээний гавьяат ажилтан" цол тэмдэгээр шагнагдаж байгууллагын "Хүндэт дэвтэр"-т алдаршуулав

  1. 2025-11-25
  2. Цаг үе, үйл явдал, Мэдээ,
  3. 149 уншсан
A- A A+
УБНА-ын дарга С.Оюунгэрэл Монгол Улсын

 

Алтан гадас одонт Улсын бүртгэлийн байгууллагын түүхт 85 жилийн ой, Бүгд Найрамдах Улс тунхагласны 101 жилийн ойг тохиолдуулан байгууллагын 3 дахь гавьяат цолтон төрлөө.   

Төрийн албанд 32 жил, үүнээс Улсын бүртгэлийн байгууллагад тасралтгүй 28 дахь жилдээ ажиллаж буй Улсын бүртгэлийн нэгдсэн архивын дарга Сүрэнжавын Оюунгэрэл өнөөдөр /2025.11.25/ Монгол Улсын Ерөнхийлөгчийн зарлигаар Монгол Улсын “Үйлчилгээний гавьяат ажилтан” хэмээх эрхэм хүндтэй цолоор шагнууллаа.

Улсын бүртгэлийн байгууллагаас төрөн гарсан шинэхэн гавьяатаа байгууллагын хамт олон ёслол төгөлдөр хүлээн авч хүндэтгэл үзүүлэн Улсын бүртгэлийн байгууллагын  “Хүндэт дэвтэр”-т нэрийг нь бичиж алдаршуулах үйл ажиллагааг өнөөдөр мөн зохион байгууллаа.  

С.Оюунгэрэл нь 1988 оноос Төв аймгийн арван жилийн сургуульд багшилж ажлын гараагаа эхлүүлсэн бөгөөд 1997-1998 онд Үл хөдлөх эд хөрөнгийн бүртгэлийн газрын Захиргаа, удирдлагын хэлтсийн даргаар, 1998-2009 оны хооронд Эд хөрөнгийн бүртгэлийн газрын Тамгын газрын дарга, 2009-2011 онд Улсын бүртгэлийн ерөнхий газрын Тамгын газрын орлогч дарга, 2011-2013 онд Нийслэлийн улсын бүртгэлийн газрын орлогч дарга, 2013 оноос эхлэн өнөөдрийг хүртэл Улсын бүртгэлийн нэгдсэн архивын даргын албыг хашиж буй манай байгууллагын бахархал болсон эрхэм хүмүүн юм.   

Улсын бүртгэлийн нэгдсэн архивын дарга С.Оюунгэрэл нь 2007 онд “Алтан гадас” одон, 2010 онд “Хөдөлмөрийн гавьяаны улаан тугийн одон”, мөн онд ЦЕГ-ын “Цагдаагийн гавьяа”, 2012 онд Хууль зүйн албаны тэргүүний ажилтан , 2015 онд Улсын бүртгэлийн тэргүүний ажилтан, 2017 онд Сонгуулийн ерөнхий хорооны “Хүндэт тэмдэг”, 2025 онд Төрийн захиргааны албаны тэргүүний ажилтан цол тэмдэгээр тус тус шагнагдаж байсан бөгөөд өнөөдөр Монгол Улсын “Үйлчилгээний гавьяат ажилтан” боллоо.  

УБНА-ын дарга С.Оюунгэрэл: “Хүний амьдралын хамаг сайхан бүхэн улсын бүртгэлийн байгууллагатай холбоотой. Тийм учраас би 28 жил ажилласан, миний 2 дахь гэр болсон улсын бүртгэлийн байгууллагадаа хайртай байдаг юм. Байгууллагынхаа үе үеийн удирдлага, ахмадууд, нийт хамт олондоо болон 80 гарч яваа өндөр настай ижийдээ хамгаас түрүүнд баярлаж талархаж байгаагаа илэрхийлье. Өнөөдөр ижийгээ бас баярлуулж байгаадаа би үнэхээр их баяртай байна. Энэ хүндтэй шагналын минь ард та бүхэн минь байгаа. Би гэхээсээ илүү бид энэ цахим бүртгэлийг, төрийн байгууллагын цахим засаглалыг түүчээлж яваа байгууллагуудын нэг. Тийм учраас бидний энэ үйл хэргийг үнэлж өнөөдөр алтан гадас одонгоор шагнаж байгаа юм шүү. Та бүхэндээ маш их баярлалаа. Хамгийн дээдийг, хамгийн сайн сайхан бүхнийг хүсэн ерөөе” гэлээ.