Улсын бүртгэлийн байгууллагын 85 жилийн ойн хүрээнд Өмнөговь аймгийн улсын бүртгэлийн хэлтсийг танилцуулж байна.
Хэлтсийн дарга Т.Нямсамбуу: Иргэн бүрийн итгэл, оролцоонд тулгуурлан илүү цахим, ил тод, хариуцлагатай үйлчилгээ рүү бид ахиж байна.
– Танай аймгийн улсын бүртгэлийн хэлтэс хэдэн онд байгуулагдсан бэ? Анхны үеийн онцлогийг дурдана уу.
Монгол Улсын Их Хурлын 2009 оны 6 дугаар сарын 25-ны өдрийн хуралдаанаар “Улсын бүртгэлийн ерөнхий хууль”-ийг баталснаар тус хуулийн дагуу тухайн оны 4 дүгээр сард Иргэний бүртгэл, мэдээллийн улсын төв, Эд хөрөнгийн эрхийн улсын бүртгэлийн газар, Татварын ерөнхий газрын Улсын бүртгэлийн албыг нэгтгэн “Улсын бүртгэлийн ерөнхий газар”-ыг байгуулсан билээ.
Түүнтэй зэрэгцэн аймаг, орон нутгийн бүртгэлийн хэлтсүүд шинээр байгуулагдаж, Улсын бүртгэлийн ерөнхий газрын дарга Л.Мөнхбаатарын 2009 оны 6 дугаар сарын 5-ны өдрийн 100 дугаар тушаалаар Өмнөговь аймгийн Улсын бүртгэлийн хэлтсийн даргаар Чулуундоржийн Энхмөнхийг томилж, тус байгууллага үүсэн байгуулагдсан түүхтэй.
Тухайн үед буюу 2010 онд Монгол Улсад анх удаа иргэний шинэчилсэн бүртгэл буюу биеийн давхцахгүй өгөгдөл — хурууны хээний бүртгэл-ийг нэвтрүүлж, иргэдийг шинэчилсэн бүртгэлд хамруулсан нь салбарын хөгжлийн түүхэнд онцлох үйл явдал болсон юм.
– Та байгууллагадаа ажиллаж байх хугацаандаа хамгийн тод харсан өөрчлөлт, ахиц дэвшил юу байсан бэ?
Иргэний цахим үнэмлэхийг хэрэглээнд нэвтрүүлснээр бүртгэлийн бүх төрөл цахим системд шилжиж эхэлсэн нь хамгийн том дэвшил байлаа. Үүний үр дүнд Иргэний улсын бүртгэл, Эд хөрөнгийн эрхийн улсын бүртгэл, Хуулийн этгээдийн улсын бүртгэл зэрэг олон үйлчилгээг цахим хэлбэрээр авах боломж бүрдэж, иргэдэд илүү хялбар, ил тод, шуурхай үйлчилгээ үзүүлэх нөхцөл бүрдсэн юм.
– Сүүлийн жилүүдэд танай байгууллагаас хэрэгжүүлсэн онцлох ажил юу вэ?
Цахим шилжилтийн хүрээнд иргэдийн цахим боловсролыг нэмэгдүүлэх чиглэлд түлхүү ажилласан. “ДӨТ машин”, гадаад паспортын өөртөө үйлчлэх машин, “E-Mongolia” зэрэг цахим платформоор үйлчилгээ үзүүлэхийн зэрэгцээ иргэдийг цахим хэрэглээнд сургах, мэдээллийн аюулгүй байдлын талаарх мэдлэгийг дээшлүүлэх ажлыг тасралтгүй зохион байгуулж ирсэн нь онцлох ажил юм.
– Иргэдэд үзүүлж буй цахим үйлчилгээний давуу талуудын талаар таны байр суурь?
Цахим бүртгэлийн үйлчилгээ нь иргэдэд цаг, орон зайн хамааралгүй хүрч, төрийн үйлчилгээний ил тод, шуурхай байдлыг хангаж байна. Мөн энэ нь авлига, ашиг сонирхлын зөрчлөөс ангид, иргэн бүрд тэгш боломж олгодог хариуцлагатай тогтолцоо юм.
– Танай орон нутагт бүртгэлийн байгууллагын ажилд онцлог нөхцөл, сорилт юу байдаг вэ?
Өмнөговь аймаг бол улс орны уул уурхай, үйлдвэрлэлийн гол бүс нутаг. Оюу толгой зэрэг мега төслүүдтэй холбоотойгоор хүн ам, эдийн засгийн идэвх эрчимтэй өсөж буйгаас бүртгэлийн үйлчилгээний эрэлт, ачаалал жил ирэх тусам нэмэгдэж байна.
Тухайлбал, 2016 онд Оюу толгойн бүтээн байгуулалтыг эд хөрөнгийн эрхийн улсын бүртгэлд бүртгэх ажлыг гүйцэтгэж, 6.2 тэрбум төгрөгийн үйлчилгээний орлого бүрдүүлж байсан. 2023 онд үл хөдлөх хөрөнгийн албан татвараар 5.2 тэрбум төгрөг төвлөрүүлж, улсын хэмжээнд тэргүүлэх үзүүлэлттэй ажилласан зэрэг нь манай хамт олны бахархал юм.
– Дараагийн 5–10 жилд бүртгэлийн байгууллага ямар чиглэлд хөгжих ёстой гэж үзэж байна вэ?
Ирээдүйд бүртгэлийн байгууллагын бүх үйлчилгээ бүрэн цахим хэлбэрт шилжих хандлагатай. Иймд цахим бүртгэлийн төрлийг нэмэгдүүлэх, мэдээллийн бааз суурийг баталгаажуулах, кибер аюулгүй байдлыг хангах чиглэлээр түлхүү хөгжүүлэх шаардлагатай гэж үзэж байна.
– Улсын бүртгэлийн байгууллагын хамт олондоо 85 жилийн ойн баярын мэндчилгээ дэвшүүлнэ үү.
Улсын бүртгэлийн байгууллага үүсэн байгуулагдсаны 85 жилийн түүхт ой тохиож байна. Үе үеийн албан хаагчид, ахмадууд болон тэдний гэр бүл, хамтран ажилладаг төрийн болон хувийн хэвшлийн байгууллагын хамт олонд чин сэтгэлийн талархал илэрхийлж, эрүүл энх, аз жаргал, амжилт бүтээлээр дүүрэн байхыг хүсэн ерөөе.
