Засгийн газрын 2025 оны 11 дүгээр сарын 12-ны өдрийн ээлжит хуралдаанаар Довдонгийн Даваанямыг Улсын бүртгэлийн ерөнхий газрын даргаар томилж, ажил хүлээлцүүлэх арга хэмжээ өнөөдөр боллоо.
Мөн Засгийн газрын тогтоолоор түүнд Улсын бүртгэлийн ерөнхий байцаагчийн эрхийг олгожээ.
Ажил хүлээлцүүлэх арга хэмжээнд Засгийн газрын хэрэг эрхлэх газрын дэд дарга Ц.Одхүү, Засгийн газрын хүний нөөцийн газрын дарга П.Сарангэрэл, Хууль зүй, дотоод хэргийн яамны Бодлогын хэрэгжилтийг зохицуулах газрын дарга А.Энх-Эрдэнэ болон Улсын бүртгэлийн байгууллагын газар, хэлтсийн дарга нар оролцлоо.
Засгийн газрын хэрэг эрхлэх газрын дэд дарга Ц.Одхүү ажил хүлээлцэх үеэр “Ерөнхий сайдын өгсөн үүрэг, чиглэлийг хэрэгжүүлж, хууль тогтоомжийг чанд сахин, бүртгэлийн байгууллагын ил тод, шударга үйл ажиллагааг улам бэхжүүлэн ажиллах”-ыг онцлон тэмдэглэж, цаашдын ажилд нь амжилт хүслээ.
