Улсын бүртгэлийн байгууллагын 85 жилийн ойн хүрээнд Дархан-Уул аймгийн Улсын бүртгэлийн хэлтсийг онцолж байна.
Дархан-Уул аймгийн Улсын бүртгэлийн хэлтсийн дарга М.Хувьзаяа: “Бүртгэл бол зөвхөн мэдээлэл биш, иргэний эрхийн баталгаа, улсын хөгжилд үлдэх үнэт ой санамж юм”
Дархан-Уул аймгийн Улсын бүртгэлийн хэлтсийн түүхэн замналаас товч дурьдвал?
Манай хэлтэс нь 2009 оны 08 дугаар сард иргэн, эд хөрөнгө, хуулийн этгээдийн улсын бүртгэлийн үйлчилгээг нэгтгэн нэг цонхоор хүргэдэг хэлбэрээр байгуулагдсан. Тухайн үед аймгийн Засаг даргын Тамгын газрын байранд байрлаж байсан Иргэний бүртгэл, мэдээллийн албанд үл хөдлөх эд хөрөнгийн бүртгэлийн албыг бүхэлд нь нэгтгэж, мөн аймгийн татварын хэлтсээс хуулийн этгээдийн улсын бүртгэлийн чиг үүргийг шилжүүлэн авч, архивыг төвлөрүүлэн байршуулснаар өнөөгийн бүтэц бүрэлдэхүүн бүрдсэн байдаг. Ингэснээр иргэд нэг дороос төрийн гурван бүртгэлийн үйлчилгээг авах шинэ соёл бүрдэж, иргэдийн сэтгэл ханамж эрс нэмэгдсэн нь байгууллагын эхний онцлох үр дүн байв.
Өнөөдрийг хүртэлх хугацаанд хийгдсэн том өөрчлөлт шинэчлэл, ахиц дэвшил юу байна вэ?
2010 оны 07 дугаар сарын 01-нээс эхлэн улс орон даяар иргэдийн биеийн давхцахгүй өгөгдлийг бүртгэж, шинэчилсэн бүртгэлд хамруулж цахим үнэмлэх олгосон нь бүртгэлийн салбарт технологийн томоохон шинэчлэл болсон. Үүний үр дүнд бүртгэлийн давхардал, хуурамч баримт бичгийн эрсдэл багасч, бүртгэл хөтлөлтийн үнэн зөв байдал баталгаажин, үйлчилгээ илүү хурдан, хүртээмжтэй болсон.
.jpg)
.png)
Танай байгууллагын сүүлийн жилүүдэд хийсэн онцлох ажил?
2021 онд харааны бэрхшээлтэй иргэдэд зориулан улсын бүртгэлийн үйлчилгээний бүрдүүлэх материалын жагсаалтыг брайль үсгээр стандартын дагуу бэлтгэн хэвлүүлж, Харааны бэрхшээлтэй иргэдийн холбоонд хүлээлгэн өгч, мөн үйлчилгээний танхимдаа байршуулан ашиглуулж эхэлсэн. Энэ нь хүртээмжтэй төрийн үйлчилгээний үлгэр жишээ ажил болсон.
Орон нутгийн бүртгэлийн хэлтсийн онцлог, мөн үйл ажиллагаагаа хэвийн явуулахад тулгардаг асуудал байна уу?
Дархан-Уул аймаг нь нийслэлд ойр байрлалтай, суурин хүн ам олонтой, шилжин суурьших урсгал өндөр аймаг. Түүнчлэн Сэлэнгэ аймгийн зарим сум газар зүйн хувьд Дарханд ойрхон байрладаг тул иргэд харьяалал харгалзахгүйгээр манай хэлтсээр үйлчлүүлэх нь их байдаг. Иймээс бүртгэлийн үйлчилгээний ачаалал жилээс жилд нэмэгдэж байна.
Цаашдын хөгжлийн чигийг юу гэж харж байна вэ?
Иргэний улсын бүртгэлийн 80 хувь нь цахимаар авах боломжтой болсон. Цаашид эд хөрөнгийн бүртгэл болон бусад үйлчилгээг мөн харьяалал үл харгалзан цахимжуулж, үйлчилгээний нэр төрлийг тэлэх нь зүйтэй. Ингэснээр иргэд бүртгэлийн бүх үйлчилгээг цахимаар авах хэвшил төлөвшинө.
Бүртгэлийн байгууллагын 85 жилийн ойн хүрээнд ажилтан, албан хаагчдадаа хандан мэндчилгээ хүргэхгүй юу?
Улсын бүртгэлийн байгууллагын 85 жилийн ойн түүхэн үйл хэрэгт зүтгэл, үйлсээ өргөсөн үе үеийн ахмад, одоо ажиллаж буй нийт хамт олондоо баярын чин сэтгэлийн мэндийг өргөн дэвшүүлж, Монгол төрийн ой санамж улам бэхжин батжихын ерөөл өргөе.
