Улсын бүртгэлийн байгууллагын 85 жилийн ойн хүрээнд Говь-Алтай аймгийн Улсын бүртгэлийн хэлтсийн дарга Г.Чүлтэмжамцтай ярилцлаа.
– Танай аймагт улсын бүртгэлийн байгууллага анх хэдийд байгуулагдсан бэ? Түүхэн онцлогоос дурдвал?
– Манай Говь-Алтай аймгийн Улсын бүртгэлийн хэлтэс нь Монгол Улсын Засгийн газрын 2008 оны 78 дугаар тогтоолоор батлагдсан “Бүртгэлийн нэгдсэн тогтолцоо”-г хэрэгжүүлэх ажлын хүрээнд байгуулагдсан. 2009 оны 06 дугаар сарын 05-ны өдөр Улсын бүртгэлийн ерөнхий газрын даргын 104 дүгээр тушаалаар тус хэлтэс байгуулагдаж байсан. Анхны жилүүдэд гурван бүртгэлийг нэгтгэн, системийг шинэ сууринаас эхлүүлсэн гэдгээрээ онцлогтой. Энэ бол зохион байгуулалтын хувьд төдийгүй иргэдэд төрийн үйлчилгээг “нэг цэгээс” үзүүлэх хувьсгалтай тэнцэх шинэчлэл байсан гэж хэлж болно.
– Та ажиллах хугацаандаа хамгийн тод харсан өөрчлөлт юу байв?
– Хамгийн их мэдэрсэн өөрчлөлт бол бүртгэлийн үйлчилгээний цахимжилт. Үйлчилгээний хүртээмж, ил тод байдал, хариуцлага сайжирч, иргэдийн эрхийг хамгаалах боломж бодитоор нэмэгдсэн. Өмнө нь зөвхөн биеэр ирж авах үйлчилгээ байсан бол өнөөдөр хаанаас ч авдаг болсон нь том дэвшил.
– Сүүлийн жилүүдэд танай хэлтсээс хэрэгжүүлсэн гол ажлуудаасаа онцолвол?
– Иргэний шинэчилсэн бүртгэл, тоон гарын үсэг, цахим үйлчилгээ гээд олон ажлууд байна. Тэдгээрээс дурдвал:
- Олон жил шийдэгдээгүй байсан байрны асуудлыг 2019 онд бүрэн шийдвэрлэж, Аймгийн ЗДТГ-ын 3 дугаар байрыг эзэмшилдээ авч, иргэдэд тохилог орчинд үйлчилгээ үзүүлдэг болсон.
- “24/7 цахим үйлчилгээ” нэвтрүүлж, иргэн цаг, орон зайнаас үл хамааран үйлчилгээ авах боломжтой болсон.
- Алслагдсан сумдад иргэн, эд хөрөнгө, хуулийн этгээдийн улсын бүртгэлийн үйлчилгээг тогтмол хүргэж байна.
– Үйлчилгээний цахимжилтын талаар байр сууриа хуваалцана уу?
– Цахим үйлчилгээ нь:
- Хүртээмжийг тэгш болгосон
- Ил тод, шударга байдлыг нэмэгдүүлсэн
- Иргэдийн цаг зардлыг хэмнэсэн
- Хяналтын системийг боловсронгуй болгосон
– Танай аймгийн онцлог, тулгардаг сорилт юу байдаг вэ?
– Манай аймаг газар нутаг уудам, хүн ам сийрэг тархалттай. Хамгийн том сорилт бол цахим шилжилтийн хүртээмжийн ялгаа. Төв суурин газарт цахим үйлчилгээний хэрэглээ өндөр байгаа ч алслагдсан сумдад интернэт болон дижитал ур чадварын хомсдол нөлөөлж байна.
– Иргэдийн оролцоо, хүлээлтийг та хэрхэн хардаг вэ?
– Оролцоо өндөр, хүлээлт бүр өндөр байна гэж хардаг. Иргэд хурдан, хүнд сурталгүй, шударга үйлчилгээ хүсэж байна. Харин цахим хэрэглээ хөдөө сумдад төдийлөн сайн дасан зохицоогүй байгаа нь оролцоог харьцангуй сул болгож байна.
– 5–10 жилийн дараах хөгжлийг та юу гэж харж байна вэ?
– Үйлчилгээг 100 хувь цахимжуулах, тоон гарын үсэг, цахим үнэмлэхийн хэрэглээг өргөжүүлэх, хиймэл оюун ухаан, блокчэйн, чатбот зэрэг технологийг нэвтрүүлэх шаардлагатай гэж үздэг. Энэ бол салбарын ирээдүй.
– Байгууллага болон хувийн зорилго?
– Үйлчилгээний чанар, хүртээмжийг үргэлжлүүлэн сайжруулах, мэдээллийн аюулгүй байдлыг хангах, ажилтнуудаа чадавхжуулах, техник тоног төхөөрөмжийн шинэчлэлийг хийх нь миний гол зорилт юм.
– 85 жилийн ойн мэндчилгээ?
– Улсын бүртгэлийн байгууллагынхаа үе үеийн ахмадууд, өнөө цагийн хөдөлмөрч хамт олон, удирдлагуудад мөн иргэддээ 85 жилийн ойн баярын мэндийг өргөн дэвшүүлье. Иргэн бүрийн эрхийг хамгаалах ариун үйлст тань улам ихийг бүтээх ерөөлийг өргөн дэвшүүлье.
