Ж.Ганболд: Архивын бүрэн цахимжилт бол улсын бүртгэлийн салбарт хийгдсэн хамгийн том шинэчлэлүүдийн нэг юм

  1. 2025-10-22
  2. Цаг үе, үйл явдал, Мэдээ, Онцлох мэдээ ,
  3. 246 уншсан
A- A A+
Ж.Ганболд: Архивын бүрэн цахимжилт бол улсын бүртгэлийн салбарт хийгдсэн хамгийн том шинэчлэлүүдийн нэг юм

Улсын бүртгэлийн байгууллагын 85 жилийн ойн хүрээнд Булган аймгийн улсын бүртгэлийн хэлтсийг онцолж байна.

Хэлтсийн дарга Ж.Ганболд: Булган аймгийн Улсын бүртгэлийн хэлтэс нь 2009 онд Засгийн газрын хэрэгжүүлэгч агентлаг Улсын бүртгэлийн ерөнхий газрын орон нутаг дахь салбар нэгж болон шинэчлэгдэн зохион байгуулагдаж, иргэн, эд хөрөнгө, хуулийн этгээдийн бүртгэлийн үйл ажиллагааг эрхлэн гүйцэтгэж байна. Хэлтэс нь эд хөрөнгө, иргэний бүртгэлийн 2 тасаг, 17 сумын улсын бүртгэгчтэйгээр нийт 31 орон тоотойгоор ажилладаг.

Шинэчлэгдэн зохион байгуулагдсанаар улсын бүртгэлийн байгууллагын нэгдмэл бодлого, стандарт үйл ажиллагаа хэрэгжиж, хууль тогтоомж, журам, заавар нэг мөр мөрдөгддөг болсон. Мэдээлэл, технологийн шинэчлэлийн хүрээнд олон төсөл, хөтөлбөрүүд амжилттай хэрэгжиж, цаасан архив бүрэн цахимжсан нь бүртгэлийн тогтолцооны шинэчлэлийн томоохон үр дүн юм. Үүний үр дүнд бүртгэлийн үйлчилгээг иргэн төвтэй, хүртээмжтэй, түргэн шуурхай хүргэх боломж бүрдэж, хэрэглэгчид газарзүйн байршлаас үл хамааран цахимаар бүртгэлийн үйлчилгээг авах боломжтой болсон.

Төрийн болон хууль хяналтын байгууллагууд мэдээллээ шууд цахимаар авах нөхцөл бүрдсэн нь цаг хугацаа, зардлыг хэмнэхийн зэрэгцээ үнэн бодит мэдээллээр хангагдах нөхцөлийг баталгаажуулж байна.

Мэдээллийн технологи, үйлчилгээний цар хүрээ өсөхийн хэрээр боловсон хүчний чадавхыг тасралтгүй дээшлүүлэх, техник тоног төхөөрөмжийн хүчин чадлыг нэмэгдүүлэх, төсвийн хангалтыг сайжруулах шаардлага байсаар байна. Мөн иргэд, харилцагч байгууллагуудын мэдээллийн программ хангамжийн бэлэн байдал жигд бус байгаагаас зарим шинэчлэл хэрэгжих явцад саатал гарах асуудал бий.

Цаашид төрийн байгууллагууд болон банк, нотариат, барилга, газар зохион байгуулалтын байгууллагуудтай мэдээллийн уялдаа холбоог шинэ түвшинд хүргэж, цахим хууль, журам, шаардлагыг бүрэн хэрэгжүүлэх, үнэт цаасны хэрэглээг энгийн цаасан хэлбэрт шилжүүлэх нь байгууллагын төсөв болон улсын бүртгэгчийн цаг хугацаанд чухал хэмнэлт авчрах ач холбогдолтой гэж үзэж байна.

Монгол Улсад улсын бүртгэлийн байгууллага үүсэж хөгжсөний 85 жилийн ойн халуун мэндийг үе үеийн ахмад ажилтан, удирдлага, хамт олон, хамтран зүтгэгчид болон ард иргэддээ чин сэтгэлийн гүн талархалтайгаар дэвшүүлж, ажил үйлс нь өөдөө дэвжин дэлгэрэхийн ерөөл өргөе.