Ц.Мөнхжаргал: Бүртгэлийн байгууллагын хамгийн том өөрчлөлт бол цахимжилт

Цуврал №3: Улсын бүртгэлийн байгууллагын 85 жилийн ойг угтан Баянхонгор аймгийн улсын бүртгэлийн хэлтсийн даргыг онцолж байна

Баянхонгор аймгийн Улсын бүртгэлийн хэлтсийн дарга Ц.Мөнхжаргал: Бүртгэлийн байгууллагын хамгийн том өөрчлөлт бол цахимжилт

Баянхонгор аймгийн Улсын бүртгэлийн хэлтэс нь Монгол Улсын Тэргүүн шадар сайдын 2009 оны 04 дүгээр сарын 13-ны өдрийн 28 дугаартай тушаалаар байгуулагдсан түүхтэй. Тухайн үед Татварын ерөнхий газрын бүртгэлийн алба, Иргэний улсын бүртгэл мэдээллийн алба, Эд хөрөнгийн эрхийн улсын бүртгэлийн байгууллагуудыг нэгтгэн улсын бүртгэлийн нэгдсэн тогтолцоонд шилжсэн нь тус хэлтсийн үндэс суурь болжээ.

Цахимжилтын эрин үеийн дэвшил

Ц.Мөнхжаргал даргын хэлснээр хамгийн том өөрчлөлт бол бүртгэлийн байгууллагын цахимжилт юм. Улсын бүртгэлийн эх нотлох баримтыг цахимжуулснаар E-Mongolia системээр дамжуулан лавлагаа, үйлчилгээг цахимаар авах боломж нээгдэж, төрийн үйлчилгээний хүртээмж өдөр ирэх бүр нэмэгдэж байна.

Бүртгэлийн үйлчилгээг иргэдэд илүү хүртээмжтэй, ойлгомжтой байдлаар хүргэх зорилгоор тус хэлтсээс “Үзүүлэх сургуулилалт” арга хэмжээг санаачлан хэрэгжүүлжээ. Энэ хүрээнд бүртгэлийн үйлчилгээг сурталчилж, сумдад явуулын 4G төхөөрөмжөөр газар дээр нь бүртгэлийн үйлчилгээ үзүүлсэн нь иргэдийн талархлыг хүлээсэн байна.

2022 оноос эхлэн иргэдэд тоон гарын үсэг олгох ажлыг амжилттай хэрэгжүүлж, 2023 онд УБЕГ ба ХААН банктай хамтран зохион байгуулсан тоон гарын үсгийг идэвхжүүлэх уралдаанд тэргүүн байр эзэлсэн нь хамт олны урам зоригийг улам бадраажээ.

“Цахим элч” – ирээдүйн цахим иргэний төлөө

2024 онд эхлүүлсэн “Цахим элч – цахим сургагч багш” хөтөлбөрийг улам өргөжүүлж, 2025 онд нийт 165 сурагчийг хамруулсан сургалт зохион байгуулсан байна. Энэхүү санаачилгаар өсвөр үеийн 200 хүүхэд, ахмад 45, хөгжлийн бэрхшээлтэй 18 иргэдийг багтаасан “Хурдан-24/7” клубийг байгуулж, иргэдийн цахим ур чадварыг нэмэгдүүлэх ажлыг Төрийн цахим үйлчилгээний хэлтэс, Насан туршийн суралцахуйн төвтэй хамтран тогтвортой хэрэгжүүлж байна.

Баянхонгор аймаг нь говь, хангай, тал хээрийн бүсийг хослуулсан онцлог нутаг тул алслагдсан сумдад бүртгэлийн үйлчилгээг түргэн шуурхай хүргэхэд сорилт тулгардаг. Мөн шугам сүлжээний хурд сул, замын хол зай зэрэг хүндрэл бий. Гэвч энэ бүхнийг даван туулахын тулд тус хамт олон орон нутгийн удирдлагуудтай хамтран бага оврын дизель генератор нөөцөлж, цахилгаан тасарсан үед ч бүртгэлийн үйлчилгээг тасралтгүй үзүүлэх нөхцөлийг бүрдүүлжээ.

Иргэдийн оролцоо ба цахим хөгжлийн шинэ үе

Ц.Мөнхжаргал даргын үзэж буйгаар, бүртгэлийн үйлчилгээ цахимжиж байгаа ч иргэдийн цахим орчны мэдлэг, ур чадвар харилцан адилгүй хэвээр байна. “Иргэд төрийн үйлчилгээг банк, дэлгүүрийн үйлчилгээ шиг шуурхай байхыг хүсдэг. Тиймээс бид илүү ойлгомжтой, хялбар, хэрэглэгч төвтэй байхыг зорьж байна” хэмээн тэр хэлэв.

Ирээдүйн зорилт

Тус хамт олон дараагийн 5–10 жилд бүртгэлийн үйлчилгээг бүрэн цахимжуулах, иргэдтэй нүүр тулан харилцах шаардлагагүй, маргаан, стрессгүй, түргэн шуурхай үйлчилгээний загварыг бүрдүүлэх зорилготой ажиллаж байна.

“Албан хаагч бүр мэдээллийн технологийн өндөр ур чадвартай, мэргэжлийн онцлогоо мэдэрсэн, хариуцлагатай манлайлагч байх ёстой” гэж тэр нэмж хэлэв.

Ойн мэндчилгээ

“Улсын бүртгэлийн байгууллагын 85 жилийн ойн баярын мэндийг үе үеийн удирдлага, ахмад ажилтан, өнөөгийн хамт олондоо хүргэе. Та бүхний байгууллагын түүхэнд оруулсан хувь нэмэр, чин сэтгэл, зүтгэлээр бидний бахархал бүтдэг билээ.”