Улсын бүртгэлийн байгууллагын 85 жилийн ойг тохиолдуулан 21 аймаг, 9 дүүргийн улсын бүртгэлийн хэлтэс болон Улсын бүртгэлийн ерөнхий газрын даргын ярилцлагыг цувралаар уншигчдад хүргэхээр бэлдлээ.
Цуврал №1: Сумын бүртгэгчээс Архангай аймгийн улсын бүртгэлийн хэлтсийн дарга хүртэл 2009 оноос эхлэн улсын бүртгэлийн байгууллагад зүтгэж буй Б.Нарантуяаг онцолж байна.
– Танай аймгийн улсын бүртгэлийн хэлтэс хэдэн онд байгуулагдсан бэ? Анхны үеийн онцлогийг дурдана уу.
1940 онд Улсын цагдан сэргийлэх газрын бүрэлдэхүүнд паспортын хэлтэс байгуулагдаж, Архангай аймагт гурван хүний бүрэлдэхүүнтэйгээр паспорт, гэр бүлийн бүртгэл хариуцан ажиллаж эхэлсэн. 1954 оноос тусгай хэлтэс байгуулагдаж, иргэний гэр бүлийн байдал, хүн амын хөдөлгөөн, байгууллагын ажлын удирдлага, хууль тогтоомжийн хэрэгжилтэд хяналт тавьж байв. Харин үл хөдлөх хөрөнгийн эрхийн бүртгэлийн товчоо 1997 онд байгуулагдаж, анхны бүртгэлээ 1998 онд хийсэн байдаг. 2003 онд газар өмчлөх эрхийн улсын бүртгэлийг эхлүүлсэн.
– Та ажиллаж байх хугацаандаа хамгийн тод харсан өөрчлөлт юу байв?
2008 оноос иргэдийн мэдээллийг хянан баталгаажуулж, 2009 оноос шинэчилсэн бүртгэл явуулснаар бүртгэлийн ажил цахимжиж эхэлсэн. Энэ нь иргэдэд илүү шуурхай, хүртээмжтэй үйлчилгээ авах боломж олгосон.
– Сүүлийн жилүүдэд танай хэлтсийн хэрэгжүүлсэн онцлох ажил юу вэ?
Улсын бүртгэлийн байгууллага нь иргэн бүрийн амьдралын чухал мөчид хамт байдаг, хамгийн ойр төрийн байгууллага юм. Тиймээс бид өдөр бүр яарсан, сандарсан, баярлаж хөөрсөн, эсвэл уурлаж уцаарласан гээд олон төрлийн сэтгэл зүйтэй иргэдтэй харилцдаг. Гэвч ямар нөхцөл байдалд байсан ч төрийн үйлчилгээг иргэн бүрд ижил тэгш, хүртээмжтэй, хөнгөн шуурхай хүргэх нь бидний үндсэн зорилго билээ.
– Цахим үйлчилгээний ач холбогдлыг хэрхэн харж байна вэ?
2023 оноос эхлэн 5914 иргэний зөрчлийг цахимаар арилгаж, 6000 гаруй иргэн өөрийн биеэр ирэлгүйгээр E-Mongolia системээс лавлагаа мэдээллээ авах боломжтой болсон. Цахимжуулалт нь иргэн, төрийн харилцааг илүү ойр болгож байна.
– Цаашдын хөгжлийн чиг хандлага?
Иргэдэд хэрэгцээтэй төрийн үйлчилгээг бүрэн цахимжуулах, төрийн үйлчилгээг илүү ойр, хүртээмжтэй болгоход анхаарч ажиллана. Архангай аймгийн улсын бүртгэлийн хэлтсийг иргэдэд нэн ойр, тэргүүлэх байгууллага болгон хөгжүүлэх зорилготой.
– Энэ жил Улсын бүртгэлийн байгууллагын 85 жилийн ой тохиож буй, та мэндчилгээ дэвшүүлнэ үү.
Монгол Улсад бүртгэлийн байгууллага үүсэж хөгжсөний 85 жилийн ой, нэгдсэн тогтолцоонд шилжсэний 16 жилийн ойг тохиолдуулан үе үеийн ахмадууд болон одоо ажиллаж буй хамт олондоо баярын мэнд дэвшүүлье. Хамт олон маань байгууллагынхаа төлөө чин сэтгэлээсээ ажиллаж байгааг хараад урам авдаг. Та бүхэндээ чин сэтгэлээсээ талархал илэрхийлье.
.jpg)
